లడక్ లో మళ్లీ టెన్షన్
ఇటానగర్, మే 27,
వాస్తవాధీన రేఖ వెంబడి తూర్పు లడఖ్‌లో భారత్, చైనాల మధ్య మరోసారి ఉద్రిక్తతలు చోటుచేసుకున్నాయి. వివాదాస్పద ప్రాంతాల్లో చైనా మరోసారి నిర్మాణాలు చేపట్టడంతో వివాదం మొదలయ్యిందిభారత్, చైనా సరిహద్దుల్లో ఉద్రిక్తతలు నెలకున్న వేళ.. డ్రాగన్ బుధవారం కీలక వ్యాఖ్యలు చేసింది. భారత్‌తో సరిహద్దుల్లో పరిస్థితి అంతా అదుపులోనే ఉందని, ఇరు దేశాలు చర్చలు, సంప్రదింపుల ద్వారా సమస్య పరిష్కారానికి ఓ విధానంతో ముందుకెళ్తున్నాయని చైనా విదేశాంగ శాఖ అధికార ప్రతినిధి ఓ ప్రకటనలో వెల్లడించారు. చైనా విదేశాంగ శాఖ అధికార ప్రతినిధి జా లింజియన్ మీడియాతో మాట్లాడుతూ.. సరిహద్దు సంబంధిత విషయాలలో తమ వైఖరి ఎప్పుడూ స్ధిరంగా, స్పష్టంగా ఉంటుందని ఉద్ఘాటించారు. భారత్‌తో సరిహద్దుల్లో పరిస్థితి నియంత్రణలోనే ఉందని స్పష్టం చేశారు. సమస్య పరిష్కారానికి ఇరు పక్షాలూ ఓ విధానంతో ముందుకెళ్తున్నాయని తెలిపారు.సరిహద్దుల్లో నియంత్రణ రేఖను దాటి ఇండియన్ ఆర్మీ తమ భూభాగంలోకి చొచ్చుకొచ్చిందని, తక్షణమే సరిహద్దులోని సైన్యాన్ని ఉపసంహరించుకుని, యథాతథ స్థితిని పునరుద్ధరించాలని ఇటీవల చైనా ఆరోపణలు చేయగా.. భారత్ తీవ్రంగా ఖండించిన విషయం తెలిసిందే. వాస్తవానికి తమ సైన్యం సాధారణ పెట్రోలింగ్‌ను చైనా బలగాలే అడ్డుకుంటున్నాయని విదేశాంగ శాఖ కౌంటర్ ఇచ్చింది. సరిహద్దు విషయంలో ఎంత బాధ్యతగా వ్యవహరించాలో తమకు తెలుసని, భారత సౌర్యభౌమాధికారం, భద్రతకు బలంగా కట్టుబడి ఉన్నామని స్పష్టం చేసింది. సిక్కిం వెంబడి ఉన్న సరిహద్దును దాటి భారత బలగాలు తమ భూభాగంలో చొచ్చుకొచ్చాయంటూ చైనా చేసిన ఆరోపణలను విదేశాంగ శాఖ ఖండించింది.మే మొదటి వారంలో తూర్పు లడఖ్‌లోని పాంగాంగ్‌ సరస్సు వద్ద రెండు దేశాలకు చెందిన దాదాపు 250 మంది సైనికులు బాహాబాహీకి దిగి, పరస్పరం పిడిగుద్దులు, రాళ్లతో దాడి చేసుకున్నారు. ఈ అంశంపై ఇరు పక్షాలకు చెందిన స్థానిక కమాండర్లు సమావేశమై చర్చించడంతో వివాదం సద్దుమణిగింది. ఇదే సమయంలో ఈ ప్రాంతానికి చేరువలోకి చైనా సైనిక హెలికాప్టర్లు చక్కర్లు కొట్టడం చర్చనీయాంశమైంది. దీనికి తీవ్రంగా స్పందించిన భారత్.. వైమానిక దళానికి చెందిన సుఖోయ్‌-30 యుద్ధ విమానాలను పంపి గస్తీ చేపట్టింది. ఇదే సమయంలో అదనపు బలగాలను సరిహద్దుల్లో మోహరించింది.