ప్లాస్టిక్ పాల దందా
నిజామాబాద్, మే 28
ప్లాస్టిక్‌తోనే పాలు తయారు చేశారు. ఈ దందా ఆలస్యంగా వెలుగులోకి వచ్చింది. కామారెడ్డి జిల్లా బాన్సువాడలో పాలను ఉడికించగా అది మొత్తం ప్లాస్టిక్‌ పదార్థంలా మారింది. ఆ పదార్థాన్ని లాగితే సాగుతోంది. భూమికి కొడితే బంతిలా ఎగురుతోంది. దిమ్మతిరిగే ఈ కల్తీ దందా చూసి అంతా ఆశ్చర్యపోతున్నారు. దీంతో అందోళన చెందిన వినియోగదారులు కల్తీ పాలపై పోలీసులకు సైతం ఫిర్యాదు చేశారు. కామారెడ్డి జిల్లా బాన్సువాడలో బుధవారం ఈ ఘటన వెలుగు చూడడం సంచలనం రేపుతోంది. పాలను ఉడికిస్తే ప్లాస్టిక్‌ పదార్థంలా మారి నేలకేసి కొడితే బంతిలా ఎగరడం చూసి స్థానికులు విస్మయానికి గురవుతున్నారు. రోజూ తాము ఎలాంటి పాలు తాగుతున్నామో అని అనుమానం వ్యక్తం చేస్తున్నారు. ద్రవ పదార్థంగా ఉన్న పాలు మరిగిస్తే అది ఘనంగా ప్లాస్టిక్‌గా తయారవుతుందంటే అందులో ఏ స్థాయిలో, ఎంత మొత్తంలో ప్రమాదకర రసాయనాలు కలుపుతున్నారో అంచనా వేసుకుంటూ స్థానికులు భయాందోళనకు గురవుతున్నారు.కామారెడ్డి జిల్లా బాన్సువాడ పట్టణంలో స్థానికంగా ఉన్న రాజారాం దుబ్బలో నివాసం ఉండే అస్లామ్‌ అనే వ్యక్తి ఓల్డ్‌ బాన్సువాడలో గల పాల కేంద్రం నుంచి ఒక లీటరు పాలు కొనుగోలు చేశాడు. ఇంటికి తీసుకెళ్లి స్టౌపై వేడి చేయగా అవి విరిగిపోయాయి. అయితే వాటిని పారేయడం ఎందుకని, ఆ పాలను వేడి చేసి అందులో చక్కెర కలుపుకొని తిందామని అతను నిర్ణయించుకున్నాడు. ఈ ఉద్దేశంతో ఆ పాలను మరింతగా మరిగించగా అవి కాస్తా ప్లాస్టిక్‌ ముద్దలాగా మారిపోయాయి. ఈ వింతను చూసి అస్లామ్ కంగుతిన్నాడు. అంతేకాక ఆ పాల ముద్ద నుంచి ప్లాస్టిక్ వాసన గమనించాడు  పలుచటిపాలు చిక్కగా అయ్యేందుకు రసాయనాలుuఈ వ్యవహారం తేడాగా ఉందని గ్రహించి డీఎస్పీ దామోదర్‌ రెడ్డికి ఈ విషయం గురించి ఫిర్యాదు చేశాడు. అనంతరం అదే పాలకేంద్రం నుంచి మరో పాలప్యాకెట్‌ను కొని వేడి చేయగా ఆ పాలు కూడా మొదట కొన్న పాలలాగే మళ్లీ ప్లాస్టిక్ ముద్దలా తయరయ్యాయి. పాలలో రసాయనాలను కలిపి విక్రయించడం వల్లే పాలు ప్లాస్టిక్‌గా మారినట్టు తొలుత నిర్ణయానికొచ్చారు. లీటర్‌కు రూ.60 చొప్పున కొంటున్న పాలలో రసాయనాలు కలుపుతున్నారని అస్లాం ఆవేదన వ్యక్తం చేశాడు. పట్టణంలో ప్లాస్టిక్ పాలు వెలుగు చూడటంతో ప్రజలు భయాందోళనకు గురవుతున్నారు. లీటర్‌కు రూ.60 చొప్పున విక్రయిస్తున్న ఆ పాలలో రసాయనాలు కలిపి చిక్కగా మారే విధంగా చేస్తున్నారని భావిస్తున్నారు. పాలలో రసాయనాలు కలపడం వల్ల అది కల్తీ అయి, ప్లాస్టిక్‌గా మారుతోందని గుర్తించారు. పెరుగు కూడా ప్లాస్టిక్‌గా తయారవుతోంది. దీనిపై ఫుడ్‌ ఇన్‌స్పెక్టర్‌ సమగ్ర విచారణ చేస్తారని. ఆయనకు ఫిర్యాదు చేస్తే కేసు నమోదు చేసి, శాంపిల్స్‌ను సేకరిస్తారని.. వెంటనే చర్యలు తీసుకుంటామని డీఎస్పీ దామోదర్ రెడ్డి చెప్పారు. ఓల్డ్ బాన్సువాడలో ఈ ఘటన వెలుగు చూడడంతో ప్రజలంతా నమ్మకం ఉన్న దగ్గర పాలు కొనాలని, ఏ మాత్రం తేడా వచ్చినా ఆహార పరిశీలన అధికారులకు సమాచారం ఇవ్వాలని డీఎస్పీ సూచించారు.