పంచ భూతాలను వదలని వైసీపీ నేతలు
విజయవాడ, జూన్ 3
రాష్ట్ర ప్రజలకు నవరత్నాలు పంచుతామని చెప్పి అధికారంలోకి వచ్చిన వైసీపీ నాయకులు ఇప్పుడు పంచ భూతాలను పంచుకు తింటున్నారని టీడీపీ రాష్ట్ర అధ్యక్షుడు, మాజీ మంత్రి కళా వెంకట్రావు వ్యాఖ్యానించారు. దళితులపై వైసీపీ కక్ష సాధింపు చర్యలు మానుకోవాలని హెచ్చరించారు. ఈ మేరకు బుధవారం కళా వెంకట్రావు మీడియాతో ఆయన మాట్లాడుతూ.. భవిష్యత్‌లో దొంగలే పాలకులు అవుతారని పోతులూరి వీరబ్రహ్మేంద్ర స్వామి చెప్తే ఎవరి గురించో అనుకున్నామని.. కానీ, ఆయన చెప్పింది వైసీపీ నేతల గురించేనని ప్రజలకు ఇప్పుడు అర్థమవుతుందని ఎద్దేవా చేశారు.చివరికి ఇసుక, మట్టి కూడా వైసీపీ నేతలు అమ్ముకుంటున్నారని కళా వెంకట్రావు ఆరోపించారు. టీడీపీ హయాంలో ఉచితంగా ఇసుక ఇస్తే.. ఇప్పుడు ఇసుక కావాలంటే వైసీపీ నేతలకు ప్రజలు కమీషన్లు ఇవ్వాల్సిన పరిస్థితి నెలకొందని మండిపడ్డారు. ఇసుక రీచ్‌లో ఎత్తిన ఇసుక ఇంటికి చేరకుండా మధ్యలోనే మాయమవుతోందని అధికార వైసీపీకి చెందిన ఎమ్మెల్యేలే చెప్తున్నారంటే దోపిడీ ఏ విధంగా ఉందో అర్థమవుతోందని దుయ్యబట్టారు.వైసీపీ పాలనలో ఇసుక కొనుగోలు చేయడం సామాన్యులకు భారంగా మారిందని ఆవేదన వ్యక్తం చేశారు. గత ప్రభుత్వ హయాంలో లారీ ఇసుక ధర రూ. 25 వేల నుంచి రూ.30 వేల వరకు పలికితే.. ఇప్పుడు రూ.60 వేల నుంచి రూ.70 వేల వరకు వసూలు చేస్తున్నారని ఆగ్రహం వ్యక్తం చేశారు. పేదలు ఇసుక కొనలేక ఇళ్ల నిర్మాణం మధ్యలోనే ఆపేసి మొండిగోడల్లో తలదాచుకోవాల్సిన పరిస్థితి నెలకొందని ఆవేదన వ్యక్తం చేశారు. ఇసుక దోపిడీకి ప్రభుత్వం అడ్డుకట్ట వేసి సామాన్యులకు ఇసుక అందుబాటులోకి వచ్చేలా దృష్టి సారించాలని ఆయన డిమాండ్‌ చేశారు. లేకపోతే ఇసుక తుపానులో వైసీపీ ప్రభుత్వం కొట్టుకుపోవడం ఖాయమని హెచ్చరించారు.