దేశానికి కొత్త ఆర్ధిక మంత్రి ?
న్యూఢిల్లీ, జూన్ 5
కేంద్రానికి కొత్త ఆర్థిక మంత్రి రానున్నారా? నిర్మలమ్మ సేవలకు ఇక మోదీ గుడ్ బై చెప్పనున్నారా ? దేశ ఆర్థిక వ్యవస్థను త్వరలోనే గాడిలోనే పెడతానంటూ ఇటీవలే మోదీ ప్రకటించారు. దీంతో ఆ మాటకు కట్టబడే కేంద్రం మంత్రివర్గంలో మార్పులు చేపడుతున్నారా ? ప్రస్తుతం ఉన్న నిర్మలా సీతారామన్‌ స్థానంలో కేంద్ర ఆర్థిక శాఖ మంత్రిగా సీనియర్‌ బ్యాంకర్‌ కేవీ కామత్‌ రానున్నారా? ఈ ప్రశ్నకు ప్రభుత్వ వర్గాల నుంచి అవుననే సంకేతాలే వినిపిస్తున్నాయిబ్రిక్స్‌ దేశాల న్యూ డెవలప్‌మెంట్‌ బ్యాంక్‌ (ఎన్డీబీ) చీఫ్‌గా ఇటీవలే ఐదేండ్లు పూర్తిచేసుకున్న కామత్‌.. వచ్చే నెలలో ఆ బాధ్యతల్ని మరొకరికి అప్పగించనున్నారు. దీంతో కామత్‌ ఆర్థిక మంత్రి పదవిని చేపట్టనున్నారన్న ఊహాగానాలకు ఊతమిస్తున్నది. ఇదిలా ఉంటే భారత తొలి పూర్తిస్థాయి మహిళా ఆర్థిక మంత్రిగా నిర్మలా సీతారామన్‌ చరిత్ర సృష్టించారు. పార్టీలో సీనియర్‌ నాయకురాలిగా ఉన్న నిర్మలకు ప్రభుత్వంలో మంచి పేరే ఉన్నది. అయితే వరుసగా రెండోసారి కేంద్రంలో అధికారం చేపట్టిన మోడీ సర్కారుకు ఈసారి ఆర్థిక పరిస్థితులు అస్సలు అనుకూలించడం లేదు.బీజేపీ అధికారంలోకి రాగానే జీడీపీ వృద్ధి రేటు ఆరంభంలోనే పడకెక్కేసింది. పాత పెద్ద నోట్ల రద్దు, జీఎస్టీ సెగలతో బక్కచిక్కిపోయిన వృద్ధిరేటును కరోనా చంపేస్తున్నది. పరిస్థితులను చక్కదిద్దడంలో కేంద్రం విఫలమైందనే విమర్శలు బలంగా వినిపిస్తున్నాయి.దీంతో వాటికి చెక్ పెట్టేందుకు మోదీ సర్కార్ ఇప్పుడు దేశ ఆర్థిక వ్యవస్థపై దృష్టి పెట్టారు. ఇటీవలే మీడియాతో మాట్లాడిన ప్రధాని తమ తొలి ప్రాధన్యాత జీడీపీ బలోపేతానికే ఇస్తామన్నారు. ఆర్థిక వ్యవస్థను వీలైనంత త్వరలోనే ఓ దారికి తీసుకు వస్తామన కూడా తెలిపారు.ఈ క్రమంలో మోదీ కేంద్ర మంత్రి వర్గ పునర్ వ్యవస్థీకరణ పేరుతో.. కేబినెట్‌లో మార్పులు చేసిన ఆశ్చర్యపోనవసరం లేదు. ఆర్థిక మంత్రిని మార్చాలన్న ఆలోచనలో కూడా మోదీ ఉన్నట్లు సమాచారం.ఆర్థిక మంత్రిగా అనుభవజ్ఞుల్ని పెట్టాలని కేంద్రం చూస్తున్నట్లు సమాచారం. ఇప్పుడున్న కార్పొరేట్‌ వ్యవహారాల శాఖను నిర్మలకే కేటాయించే అవకాశాలున్నాయి. ఈ క్రమంలోనే ఆర్థిక శాఖ పగ్గాలను మరింత సమర్థుల చేతికి అప్పగించాలన్న నిర్ణయానికి ప్రధాని మోడీ వచ్చినట్లు తెలుస్తున్నది. ఇక అంబానీలతో ఉన్న సత్సంబంధాలూ కామత్‌ను ఆర్థిక మంత్రి రేసులో ముందుంచుతున్నాయి. ముకేశ్‌, అనిల్‌ అంబానీల ఆస్తుల పంపకాల్లో కామత్‌ పెద్ద దిక్కుగా వ్యవహరించిన విషయం తెలిసిందే. అయితే ఇదే సమయంలో బ్యాంకింగ్‌ రంగంలో విశేష అనుభవం ఉన్న కామత్‌పై అవినీతి ఆరోపణలుండటం కూడా కేంద్రం పరిశీలిస్తున్నట్టు సమాచారం. మరి ఈ విషయంలో కేంద్రం ఏ నిర్ణయం తీసుకుంటుందో వేచి చూడాల్సిందే.