తబ్లీగ్ పై దర్యాప్తు అవసరం లేదు
న్యూఢిల్లీ జూన్ 5
దేశంలో కరోనా వైరస్ వ్యాప్తికి ఢిల్లీలోని నిజాముద్దీన్ మర్కజ్ ప్రార్థనలు దోహదం చేసిన విషయం తెలిసిందే. కరోనా మహమ్మారి అంతంతమాత్రంగా ఉన్న సమయంలో ఈ ప్రార్థనలు వల్లే వైరస్ వ్యాపించింది. దేశంలో కరోనా వైరస్ మహమ్మారి వ్యాప్తి అంతంతమాత్రంగానే ఉన్న దశలో ఢిల్లీలోని నిజాముద్దీన్లో నిర్వహించిన మర్కజ్ మత కార్యక్రమం కలకలం సృష్టించిన విషయం తెలిసిందే. దేశం నలుమూలల నుంచి ప్రతినిధులు ఈ కార్యక్రమంలో పాల్గొనగా.. వీరి ద్వారా కరోనా వైరస్ వ్యాపించింది. పర్యాటక వీసాపై భారత్కు వచ్చిన కొంత మంది విదేశీయులు నిబంధనలకు విరుద్ధంగా ఈ కార్యక్రమంలో పాల్గొని, కరోనా విలయానికి కారణమయ్యారు. ఈ నేపథ్యంలో 2,200కు పైచిలుకు విదేశీయులను కేంద్ర హోంశాఖ బ్లాక్ లిస్టులో పెట్టింది. వీరు పదేళ్ల పాటు భారత్లోకి రాకుండా నిషేధం విధించింది.తాజాగా, ఈ తబ్లీగ్ జమాత్ మత సమ్మేళనంపై సీబీఐ దర్యాప్తు అవసరంలేదని సుప్రీంకోర్టుకు కేంద్ర ప్రభుత్వం స్పష్టం చేసింది. ఈ మేరకు సుప్రీంకోర్టులో అఫిడ్విట్ దాఖలు చేసిన కేంద్రం.. ఈ విషయంలో దర్యాప్తును చట్టం ప్రకారం రోజువారీ ప్రాతిపదికన నిర్వహిస్తున్నామని, సమయానుసారంగా నివేదికను సమర్పించడానికి అన్ని ప్రయత్నాలు జరుగుతున్నాయని పేర్కొంది. తబ్లిగ్ జమాత్ మత సమ్మేళనాన్ని ఆపడంలో ఢిల్లీ ప్రభుత్వం, పోలీసులు విఫలమయ్యారని, ఈ లోపాలపై సీబీఐతో దర్యాప్తు జరిపించాలని కోరుతూ సుప్రియా పండిత అనే మహిళ దాఖలు చేసిన పిటిషన్పై కేంద్రం అఫిడ్విట్ దాఖలు చేసింది. తబ్లీగ్ జమాత్ అక్రమ నగదు లావాదేవీలకు పాల్పడిందని ఆరోపిస్తూ గతవారం ఆ సంస్థ సహా మరికొందరిపై ప్రాథమిక విచారణకు సీబీఐ కేసు నమోదుచేసింది. ఇదిలావుండగా, ఈ ఏడాది మార్చిలో నిర్వహించిన మర్కజ్ ప్రార్థనలకు హాజరైన విదేశీ పౌరులపై ఢిల్లీ పోలీసులు పలు చార్జిషీట్లు దాఖలు చేశారు. ఐపీసీ, విపత్తు నిర్వహణ చట్టంలోని సంబంధిత సెక్షన్ల కింద తబ్లిగ్ జమాత్ చీఫ్ మౌలానా సాద్పై పలు కేసులు కూడా నమోదయ్యాయి.