4 లక్షలు దాటిన కరోనా మృతులు
న్యూఢిల్లీ, జూన్ 8
కరోనా వైరస్ ప్రపంచవ్యాప్తంగా తన ప్రతాపం చూపుతోంది. చైనాలోని వుహాన్‌లో గత డిసెంబర్‌లో పుట్టుకొచ్చిన ఈ కొత్త వైరస్ ఇప్పటికి 4 లక్షల మందిని బలితీసుకుంది. ఆదివారం (జూన్ 7) నాటికి ప్రపంచవ్యాప్తంగా కరోనా మృతుల సంఖ్య నాలుగు లక్షలు దాటింది. అగ్రరాజ్యం అమెరికాలోనే లక్షకు పైగా మరణాలు చోటు చేసుకున్నాయి. 1.12 లక్షల మరణాలతో అమెరికాలో మొదటి స్థానంలో ఉండగా.. తర్వాతి స్థానంలో బ్రిటన్, మూడో స్థానంలో బ్రెజిల్ ఉన్నాయి. కరోనా కారణంగా యూరప్‌ దేశాల్లో 1.75 లక్షల మందికి పైగా మృతి చెందారు.కరోనా మరణాల విషయంలో మూడో స్థానంలో ఉన్న బ్రెజిల్‌ ఇక నుంచి వైరస్‌ మృతులు, కొత్తగా నమోదైన కేసుల వివరాలను వెల్లడించడం నిలిపివేస్తున్నట్లు ప్రకటించింది. ఈ నిర్ణయంపై విమర్శలు వెల్లువెత్తుతున్నాయి. బ్రెజిల్‌లో కరోనా మరణాలు ఇప్పటికే 34 వేలు దాటాయి. దేశంలో వైరస్‌ తీవ్రత, మరణాల సంఖ్యను దాచి పెట్టేందుకు బ్రెజిల్‌ తీసుకున్న అసాధారణ నిర్ణయం ఇదని విమర్శకులు మండిపడుతున్నారు.కరోనా కేసులు ఎక్కువగా ఉన్న దేశాల జాబితాలో ఐదో స్థానంలో ఉన్న భారత్‌లో కేసుల సంఖ్య అంతకంతకూ పెరుగుతోంది. గత 24 గంటల్లో సుమారు 10 వేల కేసులు (9,971) నమోదయ్యాయి. దీంతో దేశంలో మొత్తం కరోనా కేసుల సంఖ్య 2,46,628కి ఎగబాకాయి. గత కొన్ని రోజులుగా కొత్త కేసుల సంఖ్య రోజుకు 1000 చొప్పున పెరుగుతూ వస్తోంది. భారత్‌లో కొవిడ్-19 కారణంగా ఇప్పటివరకు 6,929 మంది మరణించారు.మరోవైపు.. ప్రపంచవ్యాప్తంగా కరోనా కేసుల సంఖ్య 70 లక్షలు దాటింది. కరోనా మరణాల రేటు ప్రపంచవ్యాప్తంగా 5.71 శాతంగా ఉండగా.. భారత్‌లో అది 0.49 శాతంగా ఉండటం ఊరటనిచ్చే అంశం. భారత్‌లో మహారాష్ట్ర కరోనా కేసులు, మరణాలు ఎక్కువగా ఉన్నాయి. కరోనా కేసుల్లో మహారాష్ట్ర ఇప్పటికే చైనాను దాటేసింది.