మహారాష్ట్రలోని సతారా జిల్లాలో మంగళవారం తెల్లవారుజామున ఘోర రోడ్డు ప్రమాదం జరిగింది. ఈ ఘటనలో 17 మంది కూలీలు దుర్మరణం చెందారు.రోడ్డు ప్రమాదం రూపంలో మృత్యువు ఎదురై కూలీల బతుకును చిదిమేసింది. 17 మందిని బలిగొంది.ముంబయి- బెంగళూరు జాతీయ రహదారిపై నిర్మాణ కూలీలతో వెళ్తున్న ఓ ట్రక్కు ఈ ఉదయం 4.30గంటల ప్రాంతంలో సతారా జిల్లా సమీపంలో రోడ్డు ప్రమాదానికి గురైంది. ఖాంబట్కీ ఘాట్‌ వద్ద మూల మలుపు తిరుగుతుండగా ట్రక్కు డ్రైవర్‌ నియంత్రణ కోల్పోవడంతో వాహనం అదుపుతప్పి రెయిలింగ్‌ను ఢీకొట్టి బోల్తా పడింది. ఈ ఘటనలో 17 మంది కూలీలు అక్కడికక్కడే ప్రాణాలు కోల్పోగా.. మరో 15 మంది గాయపడ్డారు.సమాచారమందుకున్న ఖండాలా పోలీసులు ఘటనాస్థలానికి చేరుకుని క్షతగాత్రులను ఆసుప్రతికి తరలించారు. ఘటన సమయంలో డ్రైవర్‌ నిద్రమత్తులో ఉన్నట్లు తెలుస్తోంది. ఆ కారణంగానే వాహనం అదుపుతప్పి ఉంటుందని పోలీసులు భావిస్తున్నారు. కాగా.. కూలీలంతా కర్ణాటకలోని బిజాపూర్‌ జిల్లా వాసులు. పుణెలో ఓ భవన నిర్మాణ పనులకు వెళ్తుండగా ఈ ఘటన చోటుచేసుకుంది. రెక్కాడితే గానీ డొక్కాడని బతుకులు వారివి. ఊరు గాని ఊరొచ్చి పొట్టకూటి కోసం కూలి పని చేసుకుంటున్న వారి జీవితాలను విధి వంచించింది.