కన్నకూతురుపై అత్యాచారం
గుంటూరు, జూన్ 9, 
ఇటీవల కాలంలో మహిళలపై అఘాయిత్యాలు పెరిగిపోతున్నాయి. సమాజంతో పాటు ఇంట్లోనూ వారికి రక్షణ లేకుండా పోతోంది. తాజాగా ఓ కామాంధుడు కన్నకూతురిపైనే అత్యాచారానికి పాల్పడిన ఘటన గుంటూరు జిల్లాలో కలకలం రేపింది. పెదనందిపాడు పోలీస్ స్టేషన్ పరిధిలో నివసిస్తున్న ఏలీయా అనే వ్యక్తి కుటుంబంతో కలిసి జీవిస్తున్నాడు. అతడికి ఓ కుమార్తె ఉంది. మద్యానికి బానిసై అతడు రోజూ తాగి ఇంటికొచ్చేవాడు.ఈ క్రమంలోనే ఇటీవల ఓ రోజు రాత్రి మద్యం మత్తులో ఇంటికొచ్చిన ఏలీయా వావి వరుసలు మరిచి నిద్రపోతున్న కన్నకూతురిపైనే అత్యాచారానికి పాల్పడ్డాడు. ఈ విషయాన్ని ఎవరికైనా చెబితే చంపేస్తానని బెదిరించడంతో బాధితురాలు మౌనంగా ఉండిపోయింది. కొద్దిరోజుల తర్వాత తల్లికి ఈ విషయం చెప్పి బోరుమంది. ఆమె తన కూతురిని వెంటబెట్టుకుని పెదనందిపాడు పోలీసులకు ఫిర్యాదు చేసింది. దీంతో పోలీసులు ఏలీయాపై కేసు నమోదు చేసి దర్యాప్తు చేపట్టారు.