కావలిలో తెలుగుదేశం పార్టీ  కార్యాలయానికి భూమి పూజ
బహిర్గతమైన వర్గ పోరు 
నెల్లూరు  జూన్ 11
కావలిలో నేలమట్టం అయివున్న తెలుగుదేశం పార్టీని తిరిగి పునర్నిర్మించే కార్యక్రమానికి  మాజీ శాసనసభ్యుడు , తెలుగుదేశం కావలి ఇంఛార్జి  కాటంరెడ్డి విష్ణువర్ధనరెడ్డి  పూనుకోవడం అభినందించాల్సిన అంశమే . గత ఏడాది కాలంగా తెలుగుదేశం పార్టీకి ఇక్కడ దిక్కూదివానం లేక వెలవెల పోతుంది . తమను కాపాడే నాయకుడు తెలుగుదేశంలో లేరని భావించుకొన్న చాలామంది దేశం కార్యకర్తలు , నాయకులు వైస్సార్సీపీలోకి వలసబాట పట్టారు . వుండే ఆ పదిమంది నాయకుల్లో రెండు గ్రూపులు . ఒక గ్రూపు ఉప్పు అంటే మరో గ్రూపు నిప్పు అంటుంది . ఇటీవల కావలిలో జరిగిన ఎన్ఠీఆర్ , బాలకృష్ణ ల జన్మదిన వేడుకలు -  రెండు గ్రూపులు ఎవరికి వారే యమునాతీరే అన్నట్లు నిర్వహించుకోవడం అందుకు అద్దంపడుతోంది . ఒక గ్రూపు పూర్తిగా ఆ పార్టీ జిల్లా అధ్యక్షులు , శాసనమండలి సభ్యులు బీదా రవిచంద్ర కనుసన్నల్లో నడుస్తుండగా - మరో గ్రూపును కాటంరెడ్డి విష్ణువర్ధనరెడ్డి నడిపిస్తున్నారు . లాక్ డౌన్ సమయంలోనూ ఏ గ్రూపుకాగ్రూపే సేవాకార్యక్రమాలు నిర్వహించాయి . ఈ నేపథ్యంలో తిథి, ముహూర్తం బాగుందని  విష్ణువర్ధనరెడ్డి భావించాడో ఏమో గాని -   పార్టీ తాత్కాలిక  కార్యాలయ నిర్మాణానికి నడుం బిగించాడు .  మాజీ మునిసిపల్ చైర్మన్ గ్రంధి యానాదిశెట్టి కుటుంబం చేత భూమి పూజ చేయించాడు . యానాదిశెట్టి అల్లుడు పోతుగంటి శ్రీకాంత్ ను , కుమార్తె మాజీ మునిసిపల్ చైర్ పర్సన్ ఆలేఖ్యను పీటల మీద కూర్చో పెట్టి భూమి పూజ తంతు   ముగింపజేశాడు . ఈ భూమి తంగుటూరి శివప్రసాద్ కు సంబంధించినదిగా తెలుస్తుంది . ఐదేళ్లపాటు అంటే వచ్చే 2024 సార్వత్రిక ఎన్నికలదాక  విష్ణువర్ధనరెడ్డి కంట్రోలులో ఆ నిర్మించబోయే తాత్కాలిక కార్యాలయం వుండేలా వుంది . ఈ భూమిపూజా కార్యక్రమం ఉప్పు వర్గం చేయగా - నిప్పు వర్గం ఎక్కడా కనిపించకపోవడం గమనార్హం .