పాకిస్తాన్ కు భారత్ కౌంటర్
న్యూఢిల్లీ, జూన్ 16, 
కరోనా వైరస్ మహమ్మారిపై ప్రపంచ దేశాలు అలుపెరగని పోరాటం చేస్తున్నాయి. మహమ్మారి బారి నుంచి ప్రజలను రక్షించడానికి పలు చర్యలు చేపడుతూ వ్యూహత్మకంగా ముందుకెళుతున్నాయి. కరోనా కట్టడికి విధించిన లాక్‌డౌన్ కారణంగా ఏర్పడిన ఆర్ధిక సంక్షోభం నుంచి బయటపడటానికి శతవిధాలుగా ప్రయత్నిస్తున్నాయి. కానీ, దాయాది పాకిస్థాన్‌ తీరు మాత్రం మారడంలేదు. నిరంతరం సరిహద్దుల్లో కవ్వింపు చర్యలు, ఎప్పటిలాగే భారత్‌పై నిరాధార ఆరోపణలు గుప్పిస్తూనే ఉంది.తాజాగా, ఐక్యరాజ్య సమితి మానవ హక్కుల మండలి(యూఎన్‌హెచ్చా్ర్సీ)లో కశ్మీర్‌ అంశాన్ని లేవనెత్తి తన వక్రబుద్ధిని మరోసారి బయటపెట్టుకుంది. కశ్మీర్‌లో మానవ హక్కుల ఉల్లంఘన జరుగుతోందంటూ గగ్గోలు పెడుతూ నానా యాగీ చేసింది. కరోనా నేపథ్యంలో ప్రపంచవ్యాప్తంగా నెలకున్న పరిస్థితులు, మానవ హక్కుల సంక్షోభాన్ని ప్రస్తావించి.. దాని పరిష్కారాలపై చర్చించాల్సిన వేదికను రాజకీయం చేసేందుకు దాయాది ప్రయత్నించింది. పాక్ కుటిల వైఖరిని దీటుగా తిప్పికొట్టిన భారత్.. రుజువులతో సహా ఎండగట్టింది.తరచూ యూఎన్‌హెచ్చార్సీ వేదికను దుర్వినియోగం చేసే పాకిస్థాన్ ఈసారీ తన వంకర బుద్ధిని కొనసాగించిడం దురదృష్టకరమని భారత రాయబారి సెంథిల్‌ కుమార్‌ దుయ్యబట్టారు. దక్షిణాసియా దేశాల్లో నరమేధాన్ని ప్రోత్సహిస్తున్న ఏకైక దేశమైన పాక్‌.. మానవ హక్కుల గురించి మాట్లాడడం విడ్డూరంగా ఉందని విమర్శనాస్త్రాలు సంధించారు. తమ సంకుచిత రాజకీయ అజెండా కోసం యూఎన్‌హెచ్చార్సీ వంటి అంతర్జాతీయ వేదికల్ని వాడుకోవడం ప్రమాదకరమైన అంశమని ఉద్ఘాటించారు. ఇతరులకు నీతులు చెప్పే ముందు పాక్‌ తన చరిత్రను వెనక్కి తిరిగి చూసుకోవాలని హితవు పలికారు.విశ్వసనీయత ప్రశ్నార్థకమైన దేశం.. మానవ హక్కులు, స్వీయ-నిర్ణయం గురించి మాట్లాడటం హాస్యాస్పదం.. మతమౌఢ్యం, రక్తపాతం నుంచి ఉద్భవించిన దాని చరిత్ర హత్యలు, తిరుగుబాట్లతో నడుస్తోంది అని సెంథిల్ కుమార్ తీవ్రస్థాయిలో ధ్వజమెత్తారు. జమ్మూ కశ్మీర్‌కు ప్రత్యేక హోదాను కల్పించే ఆర్టికల్ 370 రద్దు పూర్తిగా భారత అంతర్గత వ్యవహారమని మరోసారి స్పష్టం చేశారు.కిడ్నాప్‌లు, మతమార్పిడిలు, హత్యలు, వేధింపులు, నిర్బంధ కేంద్రాలు, ఉగ్రవాద శిబిరాలకు స్వర్గంగా మారిన ఓ దేశం భారత్‌ వంటి సహజ శాంతియుత దేశానికి నీతులు చెప్పడం వింతగా ఉందన్నారు. కనిపించకుండా పోయిన 47 వేల మంది బలోచ్‌లు, 35 వేల మంది పష్తూన్ల ఆచూకీ ఏమైందో చెప్పగలరా అని పాక్‌ను నిలదీశారు. హజారీలే లక్ష్యంగా జరిగిన హింసాత్మక ఘటనతో పాకిస్థాన్‌లో దాదాపు 500 మంది ప్రాణాలుకోల్పోగా, లక్ష మంది వలవెళ్లిన అంశాన్ని గుర్తుచేశారు.ఇటీవల పాక్‌లో సింధ్‌ ప్రాంతంలో హిందూ, క్రైస్తవ బాలికలపై జరిగిన దాడిని ప్రస్తావించారు. మైనారిటీలపై జరుగుతున్న దాడులు ఎలా వ్యవస్థీకృతమయ్యాయో వివరించారు. దైవదూషణ చట్టాల పేరుతో మైనార్టీలను భయభ్రాంతులకు గురిచేస్తోందన్నారు. ఖైర్‌పూర్‌కు చెందిన ఇద్దరు ప్రొఫెసర్లను దైవదూషణ చట్టం ద్వారా నిర్బంధించిన ఘటనను ఉదాహరణగా చెప్పారు. అలాగే 2015 నుంచి 65 మంది ట్రాన్స్‌జెండర్‌లను హత్యచేసిన విషయాలను సెంథిల్ కుమార్ ప్రస్తావించారు.