అమెరికాలో ఎత్తైన హనుమాన్ విగ్రహం..
వాషింగ్టన్, జూన్ 17,
అమెరికాలోకెల్లా ఎత్తయిన హనుమంతుడి విగ్రహాన్ని హకెస్సిన్‌లోని మీనాక్షి ఆలయంలో ప్రతిష్టించారు. 25 అడుగుల ఎత్తయిన ఈ నల్లరాతి ఏకశిలా విగ్రహం వరంగల్‌లో రూపొందినది కావడం గమనార్హం. విగ్రహం తయారీ కోసం అనువైన రాయిని గుర్తించడం నుంచి మొదలు పెడితే.. దాన్ని శిల్పంగా మార్చి అమెరికా తరలించడానికి 8 నెలలకుపైగా సమయం పట్టిందని డెలవేర్‌లోని హిందూ ఆలయ సంఘం బోర్డు ట్రస్టీస్ సభ్యుడు, ఆపరేషన్ మేనేజర్‌గా వ్యవహరిస్తోన్న బాల్‌రెడ్డి కామిరెడ్డి తెలిపారు.25 అడుగుల ఎత్తయిన హనుమంతుడి ఏకశిలా విగ్రహం 30 టన్నుల బరువు తూగుతుందని.. రవాణా ఖర్చులు కాకుండానే ఈ విగ్రహ తయారీకి లక్ష డాలర్లు ఖర్చయిందని కామిరెడ్డి తెలిపారు. విగ్రహానికి అవసరమైన రాతిని గుర్తించడం కోసం మీనాక్షి ఆలయానికి చెందిన నలుగురు సభ్యుల బృందం భారత్ వచ్చిందన్నారు.ఈ బృందం మొదట రాజస్థాన్‌ వెళ్లినా అక్కడ సరైన రాతిని గుర్తించలేపోయింది. దీంతో చివరగా వరంగల్ వచ్చింది. స్థపతి సూచనల మేరకు డిసెంబర్లో ఈ విగ్రహ తయారీ పూర్తయింది. వేయి స్తంభాల గుడి సహా వరంగల్ నగరంలోని పలు ఆలయాల్లో నల్లరాతిని వాడిన విషయాన్ని సంగతి తెలిసిందే.విగ్రహ రూపకల్పన తర్వాత హైదరాబాద్ తీసుకెళ్లగా అమెరికా తీసుకెళ్లడానికి పురావస్తు శాఖ అనుమతి ఇచ్చిందని బాల్‌రెడ్డి కామిరెడ్డి చెప్పారు. స్థానిక ప్రభుత్వ అనుమతి పొందిన తర్వాత జనవరిలో విగ్రహం న్యూజెర్సీ చేరుకుందన్నారు.హనుమాన్ విగ్రహాన్ని తీసుకెళ్లడానికి అమెరికాలో స్థానిక ప్రభుత్వం అద్భుతంగా సహకరించిందని బాల్‌రెడ్డి కామిరెడ్డి తెలిపారు. న్యూ క్యాస్ట్‌లే కౌంటీ ఎగ్జిక్యూటివ్ మ్యాట్ మైర్ కలవగా.. విగ్రహాన్ని తీసుకెళ్తున్న ట్రక్కుకు నాలుగు పోలీసు వాహనాలను కాన్వాయ్‌గా పంపించారని.. ట్రక్కు ట్రాఫిక్‌లో చిక్కుకోకుండా డెలవేర్‌లోని మెమోరియల్ బ్రిడ్జి నుంచి ఆలయం వరకు 25 కి.మీ. పొడవునా.. గ్రీన్ సిగ్నల్ ఇచ్చారని తెలిపారు.ఈ ఆలయాన్ని 1996లో జోయ్ బిడెన్ ప్రారంభించారు. అమెరికా ఎన్నికల్లో డెమొక్రాట్ల తరఫున ఆయన అధ్యక్ష పదవి కోసం పోటీలో ఉన్నారు. శనివారం విగ్రహాన్ని ప్రతిష్టించగా.. ఆదివారం కుంభాభిషేకం నిర్వహించారు. మతాలకు అతీతంగా ప్రజలు ఈ వేడుకలో పాల్గొన్నారు.