వ్యూహాత్మకంగానే చైనా దాడి
బీజింగ్, జూన్ 18
తూర్పు లడఖ్‌లోని గాల్వన్ లోయ వద్ద సోమవారం రాత్రి జరిగిన ఘర్షణలో తెలుగు తేజం కల్నల్‌ సంతోష్‌బాబుతోపాటు మొత్తం 20 మంది భారత సైనికుల వీరమరణం పొందారు. ఒక్క తూటా కూడా పేలకుండానే 20 మంది సైనికులు అమరులవడమే కాదు, పదుల సంఖ్యలో తీవ్రంగా గాయపడటం సాాధారణ విషయం కాదు. అయితే, చైనా సైన్యం వ్యూహాత్మకంగానే సంతోష్‌బాబు బృందాన్ని ఉచ్చులో బిగించినట్లు సమాచారం.సరిహద్దుల వద్ద ఏర్పడిన ప్రతిష్టంభనకు తెరదించడానికి జూన్ 6న లెఫ్టినెంట్‌ జనరల్‌ స్థాయి అధికారుల మధ్య జరిగిన చర్చల్లో ఇరు దేశాలూ తమ సైనికులను రెండున్నర కిలోమీటర్లు వెనక్కు మళ్లించాలని నిర్ణయం తీసుకున్న విషయం తెలిసిందే. ఇందులో భాగంగా గల్వాన్‌ లోయ వద్ద ఏర్పాటు చేసిన 14వ నెంబరు నిఘా చెక్‌పోస్టును చైనా తొలగించింది. ఆ తర్వాత మళ్లీ ఆదివారం అక్కడ చెక్‌పోస్టు ఏర్పాటు చేయడంతో భారత సైన్యం దాన్ని తొలగించాలని కోరింది. దీనికి చైనా దళాలు నిరాకరించడంతో కల్నల్ సంతోష్‌ నేతృత్వంలోని 16 బీహార్ రెజిమెంట్‌ దళం సోమవారం సాయంత్రం ఆ చెక్‌పోస్టును తొలగించడానికి ప్రయత్నించింది.దీంతో అప్పటికే అక్కడ మాటువేసిన చైనా సైనికులు ఒక్కసారిగా మెరుపుదాడికి పాల్పడ్డారు. ఫెన్సింగ్‌ వైర్లు బిగించి ఇనుపరాడ్లతో దాడి చేయగా, కొందరు తమ భూభాగంలోకి ఈడ్చుకుంటూ వెళ్లారని, ఇంకొందరు కొండపై నుంచి బండరాళ్లు విసరడం మొదలుపెట్టారని సమాచారం. అసలు ఏం జరుగుతోందో తెలుసుకునేలోపే చాలామంది సైనికులు తీవ్రంగా గాయపడ్డారని, మిగిలినవారు గల్వాన్‌నదిలో దూకి ఈదుకుంటూ ఒడ్డుకు చేరారని తెలుస్తోంది. వీరిచ్చిన సమాచారంతోనే రంగంలోకి దిగిన అదనపు దళాలు చైనా సైనికులతో తలపడ్డాయని తెలిసింది.గల్వాన్‌ లోయ ప్రాంతంలో భారత్‌ చేపట్టిన అనేక మౌలిక సదుపాయాల నిర్మాణాలను చైనా అడ్డుకోవడానికి ప్రయత్నించడం, అవి ఫలించకపోవడంతో దొంగదెబ్బ తీయాలని వ్యూహం పన్నిందని భావిస్తున్నారు. ఇందులో భాగంగానే భారత సైన్యాన్ని ఉచ్చులోకి లాగడానికి చెక్‌పోస్టును తొలగించినట్టే తొలగించి మళ్లీ ఏర్పాటు చేసినట్టు అనుమానిస్తున్నారు. దాన్ని తొలగించేందుకు భారత సైనికులు వస్తారు కాబట్టి వ్యూహాత్మకంగానే సిద్ధంగా ఉన్న చైనా సైన్యాలు ఒక్కసారిగా దాడి చేసి ఉంటాయని భావిస్తున్నామని ఓ అధికారి వెల్లడించారు. అయితే భారత సైనికుల ఆచూకీని కనిపెట్టడానికి చైనా డ్రోన్లు సైతం ఉపయోగించిందని విశ్వసనీయ వర్గాల సమచారం.