.jpg)
తెలంగాణ విద్యాశాఖ యూ ట్యుబ్ చానెల్
హైద్రాబాద్, జూన్ 19
కరోనా వ్యాప్తి, లాక్డౌన్ కారణంగా విద్యా రంగం అస్తవ్యస్తమైంది. స్కూళ్లు, కాలేజీలు మూతపడ్డాయి. బోధన, పరీక్షల విధానంలో పెనుమార్పులు సంభవించాయి. పరీక్షలు నిర్వహించడం కష్టంగా మారడంతో ప్రభుత్వాలు విద్యార్థులను పైతరగతులకు ప్రమోట్ చేస్తూ నిర్ణయం తీసుకున్నాయి.అయితే లాక్డౌన్ సడలింపు అనంతరం కూడా విద్యా సంస్థలను ప్రారంభించే పరిస్థితులు లేకపోవడంతో విద్యార్థులు ఈ విద్యా సంవత్సరంలోనూ నష్టపోయే ప్రమాదముంది. దీన్ని దృష్టిలో పెట్టుకుని తెలంగాణ విద్యాశాఖ కీలక నిర్ణయం తీసుకుంది. విద్యార్థుల భవిష్యత్తు ద`ష్ట్యా ఆన్‌లైన్ తరగతులను నిర్వహించాలని నిర్ణయించింది.ఇందుకోసం తెలంగాణ విద్యాశాఖ ప్రత్యేకంగా యూట్యూబ్ ఛానల్‌ను సైతం ఏర్పాటు చేసినట్టు సమాచారం. జూన్ చివరి వారం నుంచి యూట్యూబ్ ద్వారా ఆన్‌లైన్ తరగతులు అందుబాటులోకి వచ్చే అవకాశాలున్నాయి. తొలుత పదో తరగతి విద్యార్థులతో ప్రారంభించి ఆ తర్వాత మిగిలిన తరగతులకు కూడా అమలు చేసేలా ప్రణాళిక రూపొందించినట్లు తెలుస్తోంది.ఈ యూట్యూబ్ ఛానెల్‌ ద్వారా రికార్డెడ్, లైవ్ ద్వారా టీచర్లు పాఠాలను బోధించేలా ఏర్పాట్లు చేశారు. అలాగే ఆన్‌లైన్ పాఠాల కోసం ఓ వెబ్‌సైట్‌ను కూడా ప్రారంభించే ఆలోచనలో విద్యాశాఖ ఉన్నట్లు తెలుస్తోంది. మరికొద్ది రోజుల్లో ఈ విషయాలపై పూర్తి స్పష్టత రానుంది