హైద్రాబాద్ లో చైనా వస్తువుల అమ్మకాల బ్యాన్
హైద్రాబాద్, జూన్ 19,
భారత్-చైనా సరిహద్దులో తలెత్తిన ఘర్షణల ప్రభావంతో హైదరాబాద్‌కు చెందిన వ్యాపారుల సంఘం కీలక నిర్ణయం తీసుకుంది. హైదరాబాద్‌లో హోల్‌సేల్ మార్కెట్, మధ్యతరగతి షాపింగ్‌కు కేరాఫ్ అడ్రస్ అయిన బేగంబజార్, సిద్ధి అంబర్ బజార్, ఫీల్‌ఖానా హోల్‌సేల్ వ్యాపారస్తులు కీలక నిర్ణయం తీసుకున్నారు. ఇకపై చైనా ఉత్పత్తులను ఏమాత్రం విక్రయించకూడదని ఒప్పందం చేసుకున్నారు. నిజానికి ఈ ప్రాంతాల్లో చైనా నుంచి దిగుమతి చేసుకొనే ఆటబొమ్మలు, గాజు వస్తువులు, చిన్న చిన్న ఎలక్ట్రానిక్ వస్తువులను ఎక్కువగా విక్రయిస్తుంటారు. ఇతర ప్రాంతాల్లోని చిరు వ్యాపారులు ఇక్కడి హోల్‌సేల్ మార్కెట్‌లలో వాటిని కొనుగోలు చేస్తుంటారు.నాలుగు రోజుల క్రితం గాల్వాన్ లోయలో భారత్-చైనా జవాన్ల మధ్య ఘర్షణ వాతావరణం తలెత్తి 20 మంది భారత జవాన్లు వీర మరణం పొందిన సంగతి తెలిసిందే. దీంతో హైదరాబాదీ వ్యాపారులు బాధ్యతగా ముందుకు వచ్చి సంచలన నిర్ణయం తీసుకోవడం ప్రాధాన్యం సంతరించుకుంది. ఇప్పటికే దేశ వ్యాప్తంగా చైనా వస్తువులను బహిష్కరించాల్సిందేనని డిమాండ్ ఉద్ధృతంగా ప్రచారంలోకి వస్తోంది. బేగంబజార్, సిద్ధి అంబర్ బజార్, ఫీల్‌ఖానా ప్రాంతాల్లోని హోల్‌సేల్ వ్యాపారులు సమావేశమయ్యారు. చైనా వస్తువులను నిషేధించడమే కాకుండా కరోనా కేసులు రోజురోజుకూ పెరుగుతున్న నేపథ్యంలో మరో కీలక నిర్ణయం తీసుకున్నారు. ఇకపై ఉదయం 10 గంటల నుంచి సాయంత్రం 4 గంటల వరకు మాత్రమే షాపులను తెరిచి ఉంచాలని స్వచ్ఛందంగా ఆంక్షలు విధించుకున్నారు. ఇలా చేయడం ద్వారా కరోనా కట్టడికి తమవంతు పాత్రను పోషించిన వాళ్లం అవుతామని వారు ప్రకటించుకున్నారు.గాల్వాన్ లోయ దుర్ఘటన జరిగిన దరిమిలా దేశ వ్యాప్తంగా చైనాపై ఆగ్రహావేశాలు వెల్లువెత్తుతున్నాయి. దాదాపు అన్ని ప్రధాన నగరాల్లో వివిధ వర్గాలకు చెందిన వారు చైనా జెండాలను, చైనా అధ్యక్షుడి దిష్టి బొమ్మలను దహనం చేస్తూ నిరసన వ్యక్తం చేస్తున్నారు. అంతేకాకుండా బీఎస్‌ఎన్‌ఎల్, భారత రైల్వే, కాన్ఫెడరేషన్ ఆఫ్ ఆల్ ఇండియా ట్రేడర్స్ లాంటివి ఇప్పటికే కాంట్రాక్టులు.. ఇతరత్రా వాటిలో చైనాను బహిష్కరించాలని చేయాలని నిర్ణయం తీసుకున్నాయి.