దుమ్ము రేపిన స్టాక్ మార్కెట్
ముంబై, జూన్ 23
స్టాక్ మార్కెట్ అదరగొట్టింది. బెంచ్‌మార్క్ సూచీలు దుమ్ముదులిపాయి. అమెరికా డాలర్‌తో పోలిస్తే ఇండియన్ రూపాయి కూడా లాభపడింది. అయితే గ్లోబల్ మార్కెట్‌లో మాత్రం క్రూడ్ ధరలు పెరిగాయి.
దేశీ స్టాక్ మార్కెట్ పరుగులు పెట్టింది. బెంచ్‌మార్క్ సూచీలు అదరగొట్టాయి. మార్కెట్ మంగళవారం భారీగా లాభపడింది. ఈక్విటీ మార్కెట్ లాభపడటం ఇది వరుసగా నాలుగో రోజు కావడం గమనార్హం. అన్ని రంగాల షేర్లలోనూ కొనుగోళ్ల జోరు కనిపించడం ఇందుకు ప్రధాన కారణం.
ఇంట్రాడేలో సెన్సెక్స్ 571 పాయింట్లు ర్యాలీ చేసింది. 35,482 పాయింట్ల గరిష్టాన్ని తాకింది. నిఫ్టీ కూడా 104 పాయింట్ల లాభంతో 10,485 పాయింట్ల గరిష్ట స్థాయినికి చేరింది. చివరకు వచ్చేసరికి సెన్సెక్స్ 519 పాయింట్ల లాభంతో 35,430 పాయింట్ల వద్ద, ఎన్ఎస్ఈ నిఫ్టీ 160 పాయింట్ల లాభంతో 10,471 పాయింట్ల వద్ద క్లోజయ్యాయి.

✺ నిఫ్టీ 50లో బజాజ్ ఫైనాన్స్, ఎల్అండ్‌టీ, ఇండస్ఇండ్ బ్యాంక్, ఎన్‌టీపీసీ, హిందాల్కో షేర్లు లాభపడ్డాయి. బజాజ్ ఫైనాన్స్ ఏకంగా 9 శాతం పరుగులు పెట్టింది.
✺ అదేసమయంలో రిలయన్స్ ఇండస్ట్రీస్, భారతీ ఎయిర్‌టెల్, వేదాంత, మారుతీ సుజుకీ షేర్లు నష్టపోయాయి. రిలయన్స్ ఇండస్ట్రీస్ 1 శాతానికి పైగా పడిపోయింది.
✺ నిఫ్టీ‌ సెక్టోరల్ ఇండెక్స్‌లన్నీ లాభాల్లోనే క్లోజయ్యాయి. నిఫ్టీ పీఎస్‌యూ బ్యాంక్ ఇండెక్స్ 3 శాతానికి పైగా ర్యాలీ చేసింది. నిఫ్టీ బ్యాంక్, నిఫ్టీ ఫైనాన్షియల్ సర్వీసెస్, నిఫ్టీ మీడియా, నిఫ్టీ ప్రైవేట్ బ్యాంక్, నిఫ్టీ రియల్టీ ఇండెక్స్‌లు 2 శాతానికి పైగా లాభపడ్డాయి.
✺ అమెరికా డాలర్‌తో పోలిస్తే ఇండియన్ రూపాయి లాభపడింది. 38 పైసలు లాభంతో 75.64 వద్ద కదలాడుతోంది.
✺ అంతర్జాతీయ మార్కెట్‌లో క్రూడాయిల్ (ముడి చమురు) ధరలు పెరిగాయి. బ్రెంట్ క్రూడ్ ధర బ్యారెల్‌కు 1.6 శాతం పెరుగుదలతో 43.77 డాలర్లకు చేరింది. డబ్ల్యూటీఐ క్రూడ్ ధర బ్యారెల్‌కు 1.74 శాతం పెరుగుదలతో 41.44 డాలర్లకు ఎగసింది.