రెనో సిరీస్ లాంచ్ చేసిన ఒప్పో
ముంబై, జూన్ 24
ప్రముఖ స్మార్ట్ ఫోన్ బ్రాండ్ ఒప్పో తాజాగా తన రెనో 3 సిరీస్ లో ఒప్పో రెనో 3ఏ అనే మరో ఫోన్ ను లాంచ్ చేసింది. ఈ సిరీస్ లో ఇప్పటికే రెనో, రెనో 3 ప్రో స్మార్ట్ ఫోన్లు లాంచ్ అయ్యాయి. రెనో 3ఏ స్మార్ట్ ఫోన్ లో వెనకవైపు నాలుగు కెమెరాల సెటప్ ను అందించారు. అంతేకాకుండా వాటర్ డ్రాప్ నాచ్ లో సెల్ఫీ కెమెరాను కూడా అందించారు. రెండు కలర్ ఆప్షన్లు, ఒకే ర్యామ్, స్టోరేజ్ తో ఈ ఫోన్ లాంచ్ అయింది. ఈ ఫోన్ మొదటగా జపాన్ లో లాంచ్ అయింది. ఒప్పో రెనో 3ఏ స్మార్ట్ ఫోన్ ఆ కంపెనీ జపాన్ వెబ్ సైట్ లో కనిపించింది. 6 జీబీ ర్యామ్ + 128 జీబీ స్టోరేజ్ వేరియంట్ ఒక్కటి మాత్రమే ఇందులో అందుబాటులో ఉంది. దీని ధరను 39,800 జపాన్ యెన్ లుగా(సుమారు రూ.28,100) నిర్ణయించారు. బ్లాక్, వైట్ రంగుల్లో ఈ ఫోన్ అందుబాటులో ఉంది. దీనికి సంబంధించిన సేల్ జూన్ 25వ తేదీ నుంచి జపాన్ లో ప్రారంభం కానుంది. ఈ ఫోన్ మనదేశంలో ఎప్పుడు లాంచ్ అవుతుందో ఒప్పో తెలపలేదు. ఒప్పో 3ఏలో 6.44 అంగుళాల ఫుల్ హెచ్ డీ+ డిస్ ప్లేను అందించారు. స్క్రీన్ టు బాడీ రేషియో 89.9 శాతంగా ఉంది. ఇందులో 128 జీబీ స్టోరేజ్ ఉంది. మైక్రో ఎస్ డీ కార్డు ద్వారా దీన్ని 256 జీబీ వరకు పెంచుకోవచ్చు. క్వాల్ కాం స్నాప్ డ్రాగన్ 665 ప్రాసెసర్ పై ఈ ఫోన్ పనిచేయనుంది. 6 జీబీ ర్యామ్ ను ఇందులో అందించారు.ఈ స్మార్ట్ ఫోన్ లో వెనకవైపు నాలుగు కెమెరాలు ఉన్నాయి. వీటిలో ప్రధాన కెమెరా సామర్థ్యం 48 మెగా పిక్సెల్ కాగా, 8 మెగా పిక్సెల్ అల్ట్రా వైడ్ యాంగిల్ కెమెరా, రెండు 2 మెగా పిక్సెల్ కెమెరాలు కూడా ఇందులో ఉన్నాయి. సెల్ఫీ ప్రియుల కోసం ముందువైపు 16 మెగాపిక్సెల్ కెమెరాను అందించారు. ఆండ్రాయిడ్ 10 ఆధారిత కలర్ ఓఎస్ 7.1 ఆపరేటింగ్ సిస్టంపై ఒప్పో 3ఏ పనిచేయనుంది. దీని బ్యాటరీ సామర్థ్యం 4,025 ఎంఏహెచ్ కాగా, ఫాస్ట్ చార్జింగ్ టెక్నాలజీని ఈ ఫోన్ సపోర్ట్ చేయడం విశేషం. వైఫై, బ్లూటూత్, జీపీఎస్/ఏ-జీపీఎస్, ఎన్ఎఫ్ సీ, యూఎస్ బీ టైప్-సీ పోర్టు, వంటి కనెక్టివిటీ ఫీచర్లు ఇందులో ఉన్నాయి. ఈ ఫోన్ కేవలం 0.82 మిల్లీమీటర్ల మందం మాత్రమే ఉంది. దీని బరువు 175 గ్రాములు.