కిలేడీ...16 లక్షలు నొక్కేసింది
బెంగళూర్,జూన్ 24,
మోసాలు చేయడంలో తామేమీ తక్కువ తినలేదంటున్నారు కిలాడీ లేడీలు. డబ్బున్న యువకులను టార్గెట్ చేసుకుని మరీ దోచేస్తున్నారు. వలపు వల విసిరి తేరుకునేలోపే అందినకాడికి గుంజేసి ఎంచక్కా చెక్కేస్తున్నారు. సాఫ్ట్‌వేర్ యువకుడిని పెళ్లి పేరుతో ముగ్గులోకి దించి ఏకంగా రూ.16 లక్షలు కాజేసిన యువతి బాగోతం తాజాగా వెలుగుచూసింది. డబ్బు మోజు తీరాక ముఖం చాటేయడంతో బాధితుడు లబోదిబోమంటూ బెంగళూరు పోలీసులను ఆశ్రయించాడు.నగరానికి చెందిన అంకుర్ శర్మ ఓ కంపెనీలో సాఫ్ట్‌వేర్ ఇంజినీర్‌గా పనిచేస్తున్నాడు. మ్యాట్రిమొనియల్ వెబ్‌సైట్‌లో రిజిస్టర్ అయిన అంకుర్‌కి యువతితో పరిచయమైంది. కిరారా శర్మగా పరిచయం చేసుకున్న యువతి టెక్కీతో స్నేహం పెంచుకుంది. కొద్దిరోజులు చెట్టాపట్టాలేసుకుని తిరిగాక వివాహం చేసుకోవాలని నిర్ణయానికి వచ్చారు.అప్పటికే ఇద్దరూ బాగా క్లోజ్ కావడంతో అప్పుడప్పుడూ కాబోయే వాడికి ఫోన్ చేసి డబ్బులు అడిగేది. పెళ్లి చేసుకోబోయే అమ్మాయే కదా అని అంకుర్ డబ్బులు ఇచ్చేవాడు. అలా సుమారు రూ.16 లక్షలకు పైగా దోచేసిన తరువాత కానీ అసలు విషయం అర్థం కాలేదు. డబ్బు మోజు తీరిన కిలాడీ లేడీ నెమ్మదిగా దూరంగా ఉండడం ప్రారంభించింది. పెళ్లెప్పుడని బాధితుడు ప్రశ్నించడంతో షాకిచ్చింది. పెళ్లి చేసుకునే ప్రసక్తే లేదని తేల్చిచెప్పింది.ఆమె సమాధానంతో దిమ్మతిరిగిపోయిన టెక్కీ.. మోసపోయానని గ్రహించి వైట్‌ఫీల్డ్ పోలీసులను ఆశ్రయించాడు. కేసు నమోదు చేసుకున్న పోలీసులు నిందితురాలి కోసం గాలింపు చర్యలు చేపట్టారు. కిలాడీ లేడీ చేతిలో అడ్డంగా బుక్కై లక్షలకు లక్షలు మోసపోయిన బాధితుడు లబోదిబోమంటున్నాడు.
=========================