ప్రియుడి కోసం...3 ఏళ్ల కొడుకును చంపబోయింది
ఒంగోలు, జూన్ 27
ప్రియుడి మోజులో కసాయి తల్లి ఘాతుకానికి తెగబడింది. వివాహేతర సంబంధానికి అడ్డుగా ఉన్నాడని కన్నకొడుకునే కడతేర్చాలని చూసింది. ముక్కుపచ్చలారని మూడేళ్ల కొడుకుని ముక్కుమూసి చంపేందుకు యత్నించింది. ఏం జరుగుతుందో తెలియని ఆ చిన్నారి ఊపిరాడక పెద్దగా కేకలు పెట్టడంతో విషయం వెలుగులోకి వచ్చింది. ఈ అత్యంత దారుణ ఘటన ప్రకాశం జిల్లాలో జరిగింది.గిద్దలూరు మండలం ఓబులాపురం తండాకి చెందిన మహిళ భర్త నుంచి విడిపోయి దూరంగా ఉంటోంది. తన మూడేళ్ల కొడుకుతో కలసి జీవిస్తోంది. ఆమెకు అదే ప్రాంతానికి చెందిన అల్లావల్లి అనే వ్యక్తితో వివాహేతర సంబంధం ఏర్పడింది. అతనితో రాసలీలలు సాగించేది. తన శారీరక సంబంధానికి కొడుకు అడ్డుగా ఉన్నాడని భావించి దారుణానికి పాల్పడింది. అభంశుభం తెలియని చిన్నారిని ఊపిరాడకుండా చేసి హత్య చేసేందుకు యత్నించింది.నోరు, ముక్కు మూయడంతో ఊపిరాడక చిన్నారి పెద్దగా కేకలు పెట్టడంతో కథ అడ్డం తిరిగింది. ఇరుగుపొరుగు వచ్చి చూడడంతో హత్యాయత్నం చేస్తూ రెడ్‌హ్యాండెడ్‌గా దొరికిపోయింది. పోలీసులకు సమాచారం అందించడంతో కసాయి తల్లి, ఆమె ప్రియుడిని అదుపులోకి తీసుకున్నారు. బంధువుల ఫిర్యాదు మేరకు పోలీసులు కేసు నమోదు చేశారు. బాలుడు స్వల్పగాయాలతో బయటపడ్డాడు