ముంబై, జూలై 3, దేశీ స్టాక్ మార్కెట్ లాభాల ట్రెండ్ కొనసాగుతోంది. బెంచ్‌మార్క్ సూచీలు ఈరోజు కూడా పరుగులు పెట్టాయి. సానుకూల అంతర్జాతీయ సంకేతాల కారణంగా మార్కెట్ శుక్రవారం లాభాలతో దూసుకెళ్లింది. సూచీలు లాభపడటం ఇది వరుసగా మూడో రోజు కావడం గమనార్హం.ఇంట్రాడేలో సెన్సెక్స్ 267 పాయింట్ల వరకు ఎగసింది. 36,110 పాయింట్ల పైకి చేరింది. నిఫ్టీ కూడా 10,631 పాయింట్ల గరిష్టాన్ని తాకింది. చివరకు వచ్చేసరికి సెన్సెక్స్ 169 పాయింట్ల లాభంతో 36,012 పాయింట్ల వద్ద, ఎన్ఎస్ఈ నిఫ్టీ 56 పాయింట్ల లాభంతో 10,607 పాయింట్ల వద్ద క్లోజయ్యాయి.
✺ నిఫ్టీ 50లో ఐషర్ మోటార్స్, అదానీ పోర్ట్స్, భారతీ ఎయిర్‌టెల్, హీరో మోటొకార్ప్, ఎన్‌టీపీసీ షేర్లు లాభపడ్డాయి. ఐషర్ మోటార్స్ 3 శాతానికి పైగా పెరిగింది.
✺ అదేసమయంలో జేఎస్‌డబ్ల్యూ స్టీల్, టాటా స్టీల్, ఇండస్ఇండ్ బ్యాంక్, జీ ఎంటర్‌టైన్‌మెంట్, హెచ్‌డీఎఫ్‌సీ బ్యాంక్ షేర్లు నష్టపోయాయి. ఇవ్వన్నీ 1 శాతానికి పైగా పడిపోయాయి.
✺ నిఫ్టీ‌ సెక్టోరల్ ఇండెక్స్‌లన్నీ మిశ్రమంగానే క్లోజయ్యాయి. నిఫ్టీ ఆటో ఇండెక్స్, నిఫ్టీ ఎఫ్ఎంసీజీ ఇండెక్స్, నిఫ్టీ ఐటీ ఇండెక్స్, నిఫ్టీ ఫార్మా ఇండెక్స్, నిఫ్టీ రియల్టీ ఇండెక్స్‌లు లాభపడ్డాయి. మిగతావన్నీ ఇండెక్స్‌లు నష్టపోయాయి.
✺ అమెరికా డాలర్‌తో పోలిస్తే ఇండియన్ రూపాయి లాభపడింది. 37 పైసలు లాభంతో 74.64 వద్ద కదలాడుతోంది. ఇది మూడు నెలల గరిష్ట స్థాయి.
✺ అంతర్జాతీయ మార్కెట్‌లో క్రూడాయిల్ (ముడి చమురు) ధరలు తగ్గాయి. బ్రెంట్ క్రూడ్ ధర బ్యారెల్‌కు 1.39 శాతం తగ్గుదలతో 42.55 డాలర్లకు క్షీణించింది. డబ్ల్యూటీఐ క్రూడ్ ధర బ్యారెల్‌కు 1.38 శాతం క్షీణతతో 40.09 డాలర్లకు తగ్గింది