న్యూఢిల్లీ, జూలై 8, 
దేశంలో కరోనా వైరస్ మహమ్మారి మరింత ఉద్ధృతంగా ఉంది. అత్యధికంగా పాజిటివ్ కేసులు నమోదయిన దేశాల్లో భారత్ మూడో స్థానంలో కొనసాగుతోంది. ఇప్పటి వరకూ మొత్తం పాజిటివ్ కేసుల సంఖ్య 7.43 లక్షలకు చేరగా.. జులై తొలివారంలోనే దాదాపు 1.60 లక్షల కేసులు నమోదయ్యాయి. అంతేకాదు, ఈ నెల తొలివారంలోనే 3,236 మంది ప్రాణాలు కోల్పోయారు. దీంతో దేశంలో మొత్తం కరోనా మరణాలు 20,653కి చేరాయి. అంతేకాదు, మంగళవారం దేశంలో మరో 23వేల మందికి వైరస్ నిర్ధారణ కాగా.. 479 మంది చనిపోయారు.కరోనా నుంచి ఇప్పటి వరకూ 4.57 లక్షల మంది కోలుకుని డిశ్చార్జ్ అయ్యారు. మరో 2.65 లక్షల మంది వివిధ హాస్పిటల్స్‌లో చికిత్స పొందుతున్నారు.  మహారాష్ట్ర (5,134), తమిళనాడు (3,616), ఢిల్లీ (2,008)లో కేసుల సంఖ్య కాస్త తక్కువగా నమోదయ్యింది. అయితే, ఉత్తర్‌ప్రదేశ్ (1,346), గుజరాత్ (778), రాజస్థాన్ (716), ఒడిశా (571)లో మాత్రం రికార్డు స్థాయిలో పాజిటివ్ కేసులు నిర్ధారణ కావడం గమనార్హం.బుధవారం దేశవ్యాప్తంగా 479 మంది ప్రాణాలు కోల్పోగా.. అత్యధికంగా మహారాష్ట్రలో 224 మంది చనిపోయారు. ఒక్క ముంబయి నగరంలోనే 64 మంది బలయ్యారు. ముంబయిలో కరోనా మరణాల సంఖ్య 5,000 దాటింది. దీంతో, కరోనా మరణాల్లో చైనాను ముంబయి దాటేసింది. అక్కడ ఇప్పటి వరకు 4,634 మంది ప్రాణాలు కోల్పోయారు. మంగళవారం బెంగళూరులో 800కిపైగా పాజిటివ్ కేసులు బయటపడ్డాయి.తెలుగు రాష్ట్రాల్లో మహమ్మారి విజృంభణ కొనసాగుతోంది. మంగళవారం ఏపీలో 1,178 కొత్త కేసులు నమోదయ్యాయి. వీటిలో రాష్ట్రంలోని వివిధ జిల్లాల్లో 1,155 కేసులు, ఇతర రాష్ట్రాలు, విదేశాల నుంచి వచ్చిన వారిలో 23 కేసులు బయటపడ్డాయి. తెలంగాణలో కొత్తగా 1,879 కరోనా కేసులు నమోదయ్యాయి. అత్యధికంగా జీహెచ్‌ఎంసీ(హైదరాబాద్‌) పరిధిలో 1,422 మందికి వైరస్‌ సోకినట్లు నిర్ధారించారు. క్రమేణా హైదరాబాద్‌, పరిసర జిల్లాలతో పాటు రాష్ట్రంలోని అన్ని జిల్లాల్లోనూ వైరస్‌ జాడలు విస్తరిస్తుండటం ఆందోళన కలిగిస్తోంది.