హైద్రాబాద్, జూలై 12,
దివంగత ముఖ్యమంత్రి వైఎస్ రాజశేఖరరెడ్డి సతీమణి వైఎస్ విజయమ్మ స్వయంగా రచించిన ‘‘నాలో.. నాతో.. వైఎస్సార్‌’’ పుస్తకం పేరుతో పీడీఎఫ్‌ ఫైల్‌ను సామాజిక మాధ్యమాల్లో సర్క్యూలేట్‌ చేస్తున్నారు. ఈ విషయం తమ దృష్టికి వచ్చిందని, వైఎస్ విజయమ్మ రాసిన పుస్తకానికి, దీనికి సంబంధం లేదని టీటీడీ చైర్మన్‌, ముఖ్యమంత్రి వైఎస్ జగన్మోహన్‌రెడ్డి బాబాయ్ వైవీ సుబ్బారెడ్డి తేల్చి చెప్పారు. ఎమెస్కో పబ్లికేషన్స్ అచ్చువేసిన పుస్తకమే అసలైన పుస్తకమని ఆయన స్పష్టం చేశారు.సామాజిక మాధ్యమాల్లో సర్క్యులేట్‌ అవుతున్న పీడీఎఫ్‌ ఫైల్‌లోని అంశాలు వేర్వేరుగా ఉన్నాయని వైవీ సుబ్బారెడ్డి వెల్లడించారు. దురుద్దేశంతోనే ఈ పీడీఎఫ్‌ ఫైల్‌ను సర్క్యులేట్‌ చేస్తున్నారని ఆరోపించారు. దీనిపై చట్ట ప్రకారం చర్యలు తీసుకుంటామని వెల్లడించారు. ఈ వ్యవహారంపై ఇప్పటికే రాష్ట్ర డీజీపీకి ఫిర్యాదు చేశామని, వైఎస్సార్‌ అభిమానులు కూడా ఈ అంశాన్ని గమనించాలని వైవీ సుబ్బారెడ్డి కోరారు.కాగా, దివంగత ముఖ్యమంత్రి వైఎస్సార్‌ సతీమణి వైఎస్‌ విజయమ్మ ‘నాలో.. నాతో.. వైఎస్సార్‌’’ పుస్తకాన్ని రాసిన విషయం తెలిసిందే. దివంగత మహానేత 71వ జయంతి సందర్భంగా ఈ నెల 8వ తేదీన తన మాతృమూర్తి రాసిన ఈ పుస్తకాన్ని వైఎస్సార్ తనయుడు, ముఖ్యమంత్రి వైఎస్‌ జగన్మోహన్‌రెడ్డి ఇడుపులపాయలో ఆవిష్కరించారు. డాక్టర్‌ వైఎస్సార్‌ సహధర్మచారిణిగా వైఎస్‌ విజయమ్మ 37 ఏళ్ల జీవితసారమే ఈ పుస్తకం. 2009 సెప్టెంబరు 2న అనూహ్యంగా వైఎస్సార్‌ మరణించిన నాటి నుంచి కలిగిన భావోద్వేగాల సమాహారంగా ఈ పుస్తకాన్ని రచించారు.మహానేత గురించి లోకం ఏమనుకుంటున్నదీ తాను ప్రజల నుంచి తెలుసుకున్నానని, ఆయన గురించి ప్రజలకు తెలియని కొన్ని విషయాలు తెలిపేందుకే ఈ పుస్తకాన్ని తీసుకొచ్చినట్లు వైఎస్‌ విజయమ్మ తన తొలి పలుకులో తెలిపారు. వైఎస్సార్‌ ఒక తండ్రిగా, భర్తగా ఎలా ఉండేవారో ఈ పుస్తకం ఆవిష్కరించింది. కొడుకుగా, తండ్రిగా, అన్నగా, తమ్ముడిగా, భర్తగా, అల్లుడిగా, మామగా, స్నేహితుడిగా, నాయకుడిగా... నిజ జీవితంలో వైఎస్సార్‌ ఈ వేర్వేరు పాత్రల్లో ఎలా ఉండేవారో, ప్రతి ఒక్కరితో ఎంత ఆత్మీయంగా మెలిగేవారో.. విజయమ్మ వివరించారు.