వాషింగ్టన్, జూలై 16,
అకడమిక్ కోర్సులను పూర్తిగా ఆన్‌లైన్‌లో అభ్యసిస్తున్న అంతర్జాతీయ విద్యార్థుల వీసాలన్నింటినీ రద్దు చేయాలని అమెరికా ప్రభుత్వం తీసుకున్న నిర్ణయం షాక్‌కు గురిచేసిన విషయం తెలిసిందే. తాజాగా, ఈ అంశంపై ట్రంప్ యంత్రాంగం వెనక్కు తగ్గింది. ప్రపంచాన్ని గందరగోళంలో పడేసిన ప్రతిపాదనకు న్యాయస్థానం జోక్యంతో శుభం కార్డు పడింది. వీసాల రద్దు నిర్ణయాన్ని వెనక్కి తీసుకుంటూ.. రద్దు చేస్తున్నట్లు జారీ చేసిన ఆదేశాలను అమెరికా ఇమ్మిగ్రేషన్ విభాగం ఉపసంహరించుకుంది.మసాచుసెట్స్‌లోని యుఎస్ జిల్లా న్యాయమూర్తి అల్లిసన్ బురోస్ మాట్లాడుతూ.. విదేశీ విద్యార్థుల వీసాల రద్దును సవాల్ చేస్తూ వేసిన పిటిషన్‌పై యుఎస్ ప్రభుత్వం, హార్వర్డ్ యూనివర్సిటీ, మసాచుసెట్స్ ఇన్‌స్టిట్యూట్ ఆఫ్ టెక్నాలజీ జులై 6 నిబంధనలను వెనక్కి తీసుకొని మునుపటి స్థితిని పునరుద్ధరించేందుకు ఓ ఒప్పందానికి వచ్చాయన్నారు.కరోనా వైరస్ విజృంభణ కారణంగా అంతర్జాతీయ విద్యార్థులకు తరగతులను ఆన్‌లైన్‌లో బోధించడానికి, విద్యార్థి వీసాలతో దేశంలో చట్టబద్ధంగా ఉండటానికి మార్చిలో అమలు చేసిన విధానాన్ని ఈ ఒప్పందం తిరిగి ఏర్పాటు చేస్తుందని తెలిపారు. విధానపరమైన ఆదేశాలు, తరచుగా అడిగే ప్రశ్నలు రెండూ ఎక్కడైనా అమలు జరగవని జడ్జి బరోస్ అన్నారు.ట్రంప్ యంత్రాంగం తీసుకున్న నిర్ణయంపై బోస్టన్ కోర్టు ఎలాంటి తీర్పు వెలువరిస్తోందని అమెరికాలోని వేలాది మంది విదేశీ విద్యార్థులు ఉత్కంఠగా ఎదురుచూశారు. హార్వర్డ్-ఎంఐటీ కేసులో మంగళవారం న్యాయస్థానం వెలువరించిన తీర్పుతో ఊపిరి పీల్చుకున్నారు.విధానపరమైన నియమాలను ఉల్లంఘించి ఇమ్మిగ్రేషన్ అధికారులు మార్గదర్శకాలను జారీచేశారని ఎంఐటీ-హార్వర్డ్ తరఫున న్యాయవాదులు వాదించారు. ఆన్‌లైన్ తరగతుల కారణంగా విదేశీ విద్యార్థుల వీసాలను రద్దుచేస్తున్నట్టు యుఎస్ ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ నిర్ణయం మార్చి 13 నాటి ఆదేశాలకు విరుద్ధంగా ఉన్నాయని స్పష్టం చేశారు.విదేశీ విద్యార్థులకు మంజూరు చేసే వీసాలను రద్దు చేయాలనే నిర్ణయాన్ని క్రూరమైందిగా తమ పిటిషన్లలో పేర్కొన్నాారు. కరోనా వైరస్ వల్ల నెలకొన్న పరిస్థితులను అడ్డుగా పెట్టుకుని ప్రభుత్వం చట్ట వ్యతిరేక నిర్ణయాన్ని తీసుకుందని దుయ్యబట్టారు.అమెరికన్ మెడికల్ అసోసియేషన్, ఆటోవర్కర్స్ యూనియన్లతో సహా గూగుల్; ఫేస్‌బుక్, మైక్రోసాఫ్ట్, ట్విట్టర్ సహా దిగ్గజ సంస్థలతో పాటు అనేక యూనివర్సీటీలు దీనికి మద్దతుగా నిలిచాయి. అలాగే 18 రాష్ట్రాలకు చెందిన అటార్నీ జనరల్స్ కూడా ఇమ్మిగ్రేషన్ అధికారుల నిర్ణయాన్ని వ్యతిరేకిస్తూ వేర్వేరుగా వ్యాజ్యాలు దాఖలు చేశారు.