విశాఖపట్టణం, జూలై 25,
కరోనా ప్రభావం పెళ్లిళ్లపై పడింది. జీవితంలో ముఖ్యమైన వివాహ వేడుకను ఘనంగా నిర్వహించుకోవడానికి సిద్ధమైన వారి ఆశలపై నీళ్లు చల్లింది. ఎలాంటి హంగామా లేకుండా కేవలం 20మందితో పెళ్లి తంతు ముగించాల్సిన పరిస్థితి. అంతేకాదు వివాహం చేసుకునే ముందు ప్రభుత్వం నుంచి అనుమతి తప్పనిసరి చేశారు. దీంతో పెళ్ళిళ్లు ఎలాంటి ఆర్భాటం లేకుండా సాదాసీదాగా ముగిస్తున్నారు. దీంతో బంధుమిత్రుల ఆనందోత్సహాలు.. చిరకాలం గుర్తుండిపోయేలా షడ్రసోపేతమైన విందు భోజనాలు లేకుండాపోయాయి. ఇదిలా ఉంటే పెళ్లికి అతిథుల్ని, బంధువుల్ని పిలవలేకపోయామనే లోటును భర్తీ చేసేందుకు కొంతమంది వినూత్నంగా ఆలోచిస్తున్నారు. బంధుమిత్రులందరికీ పెళ్లి వేడుక సందర్భంగా మంచి విందు భోజనం అందించేలా విశాఖకు చెందిన ఓ యువకుడికి అదిరిపోయే ఐడియా తట్టింది.విశాఖకు చెందిన యువకుడికి ఐదు నెలల కిందట వివాహం నిశ్చయమైంది. నిశ్చితార్థం నిర్వహఇంచారు.. జూలై 25న వివాహం ఘనంగా నిర్వహించేందుకు ఇరు కుటుంబాలు సిద్ధమయ్యాయి. ఇంతలోనే కరోనా మహమ్మారి వచ్చిపడింది. ఘనంగా పెళ్లి వేడుక నిర్వహించాలనుకున్న వారి ఆశ నిరాశే అయ్యింది. ప్రభుత్వ నిబంధనలు పాటించాల్సిన పరిస్థితి.. వివాహం సంగతి అలా ఉంటే.. విందు భోజనం సంప్రదాయాన్ని కొనసాగించాలని పెళ్లి కుమారుడు నిర్ణయించుకున్నాడు. బంధువులు, అతిథులకు ఎలాగైనా భోజనం పెట్టాలనుకున్నాడు.పెళ్లికి అందర్నీ పిలిచి భోజనాలు పెట్టలేకపోతున్నా.. భోజనాలు తయారు చేసి నేరుగా బంధువుల ఇంటికే పంపించాలని నిర్ణయించుకున్నాడు. బంధువుల ఇంటికే నేరుగా టిఫిన్, మధ్యాహ్న భోజనం, రాత్రి భోజనం పంపించేలా ఏర్పాట్లు చేశాడు. శుక్రవారం యువకుడ్ని పెండ్లి కుమారుడ్ని చేయగా.. ఉదయం 7 గంటలకే బంధువుల ఇంటికి నేరుగా టిఫిన్‌ పంపించాడు. 11 గంటలకే భోజనం కూడా అందించాడు. ఇంట్లో ఎంతమంది ఉంటున్నారో తెలుసుకుని టిఫిన్, భోజనాలు, ప్లేట్లు, స్పూన్, వాటర్‌ బాటిల్ ఇలా మంచి విందు భోజనం పంపాడు. పెళ్లికి వెళ్లలేకపోయినా ఎవరి ఇళ్లలలో వారే పెళ్లి భోజనం సంతృప్తిగా ఆరగించారు. ఈ యువకుడి వినూత్న ఆలోచన ఇప్పుడు మరికొంతమంది అమలు చేస్తున్నారు.