తిరుమల, జూలై 28, 
తిరుమల శ్రీవారి ఆదాయానికి కరోనా గండి కొట్టింది. గత నాలుగు నెలల్లో పరిస్థితి మరీ దారుణంగా మారింది. గత నెలల్లో దాదాపు 90లక్షలమంది భక్తులు వెంకటేశ్వరుడి దర్శనభాగ్యం కోల్పోయారు. ఇక టీటీడీ అంచనా ప్రకారం రూ.1100కోట్ల ఆదాయం వస్తుందని అంచనా వేస్తే.. కేవలం రూ.270కోట్లు మాత్రమే వచ్చింది. అది కూడా రూ.240కోట్లు వడ్డీల రూపంలో వస్తే.. మిగిలిన రూ.30కోట్లు శ్రీవారి హుండీ, భక్తుల దర్శనం ద్వారా వచ్చిన ఆదాయం. అంటే టీటీడీ దాదాపు రూ.800కోట్ల వరకు ఆదాయాన్ని కోల్పోయింది. ప్రస్తుతం తిరుమల వెంకన్న దర్శనానికి భక్తుల రద్దీ తగ్గింది.ఇక టీటీడీలో 3.5 కోట్ల లడ్డూ విక్రయాలు తగ్గిపోయాయి. వైరస్ మహమ్మారి కారణంగా తలనీలాలు సమర్పించని భక్తుల సంఖ్య 36 లక్షలు. ఇక టీటీడీ వార్షిక బడ్జెట్ రూ. 3 వేల కోట్లకుపైన ఉంటే.. టీటీడీ వార్షిక బడ్జెట్‌ను తగ్గించే అవకాశం ఉంది. పరిస్థితి ఇలాగే కొనసాగితే మరింత ఆదాయం తగ్గుతుందని టీటీడీ భావిస్తోంది. అంతేకాదు ఒక నెలలో ఉద్యోగులకు జీతాల విషయంలో ఇబ్బంది తప్పడం లేదు.కరోనా, లాక్‌డౌన్ దెబ్బకు మార్చి 20న టీటీడీ తిరుమల వెంకన్న దర్శనాలు నిలిపివేసింది. కేంద్రం లాక్‌డౌన్ సడలించడంతో రాష్ట్ర ప్రభుత్వ అనుమతితో జూన్ 8న దర్శనాలు ప్రారంభించింది. జూన్ 8, 9న టీటీడీ ఉద్యోగులకు దర్శన భాగ్యం కల్పించి ముందు ట్రైల్ రన్ నిర్వహించారు. జూన్ 10న తిరుపతి స్థానికులకు అవకాశం కల్పించారు.. జూన్ 10 నుంచి సాధారణ భక్తులకు దర్శనానికి అనుమతించారు. భౌతిక దూరం, మాస్కులు, శానిటైజర్ వంటి జాగ్రత్తలు తీసుకుంటున్నారు. భక్తుల కోసం ముందస్తు జాగ్రత్తలు తీసుకుంటున్నారు. అయితే కొద్దిరోజులుగా తిరుమల వెంకన్న దర్శనానికి భక్తుల రద్దీ తగ్గిపోయింది. తిరుపతి, టీటీడీలో కరోనా కేసులు పెరగడంతో కొంతమంది ఆన్‌లైన్‌లో టికెట్లు తీసుకున్నా.. దర్శనానికి దూరంగా ఉంటున్నారు.మరోవైపు టీటీడీ నిర్వహణ ఖర్చులు తగ్గించారు. భక్తులు లేని కారణంగా అన్నప్రసాదం ఆగిపోయింది. పారిశుద్ధ్య నిర్వహణ, రవాణా, విద్యుత్తు వినియోగం తగ్గి.. ఆ మేరకు ఖర్చులు కాస్త ఆదా అయ్యాయి.. ఇది కొంత ఉపశమనం అంటోంది టీటీడీ. లాక్‌డౌన్ తర్వాత భక్తుల్ని మళ్లీ అనుమతిస్తే హుండీకి, ఇతర విరాళాలు.. అద్దె గదులు, ప్రసాద విక్రయాలు, ఆర్జిత సేవల ద్వారా వచ్చే ఆదాయానని బట్టి టీటీడీ ఆర్థిక పరిస్థితి ఆధారపడి ఉంది.