గుంటూరు, ఆగస్టు 10
ప్రకాశం జిల్లా బేస్తవారిపేటలో అరుదైన జంతువు కనిపించింది. లలితమ్మ గుడి సమీపంలో అలుగు దర్శనమిచ్చింది. స్థానికులు ఆ జంతువును గుర్తించి వెంటనే అటవీశాఖ అధికారులు గుర్తించారు. .సమాచారం అందుకున్న గిద్దలూరు రేంజి ఫారెస్ట్ ఆఫీసర్ సిబ్బందితో పట్టుకుని గిద్దలూరుకు తరలించారు. ఈ జంతువును ప‌ంగోలిన్‌ అంటారు. దీన్ని తెలుగులో అలుగు అంటారు. ఈ జంతువుకు మార్కెట్‌లో మంచి గిరాకీ ఉంది. కొంతమంది వేటగాళ్లు వీటిని పట్టుకుని స్మగ్లింగ్ చేస్తున్నారు. కేన్సర్ మందుల త‌యారీలో అలుగు పొలుసుల‌ను వినియోగిస్తార‌నే ప్ర‌చారం జ‌రుగుతుండ‌టంతో వాటిపై స్మ‌గ్ల‌ర్ల దృష్టి ప‌డింది. దీంతో జోరుగా అలుగుల స్మ‌గ్లింగ్ జ‌రుగుతున్న‌ది. పెంగోలియాన్‌కు విదేశాల్లో మంచి డిమాండ్ ఉంది.. అందుకే వేటగాళ్లు వీటిపై కన్నేశారు.
ఇటీవల గుంటూరు జిల్లాలో స్మగ్లర్లు అటవీశాఖ అధికారులకు దొరికిపోయారు. ఇద్దరు వ్యక్తులు వలవేసి అలుగును పట్టుకున్నారు. దానిని విక్రయించడానికి యూట్యూబ్‌లో పోస్ట్ చేశారు.. ఇది ట్రాఫిక్ ఇండియా కంటపడగా.. ఈ సమాచారాన్ని అటవీశాఖ ఉన్నతాధికారులకు అందించారు. ఈ అలుగుని రూ.65 లక్షలకు అమ్మేందుకు ప్రయత్నించారు. అటవీశాఖ అధికారులే ఆ అలుగును కొనుగోలు చేసేందుకు వెళ్లినట్లు డ్రామా ఆడారు.. ఆ జంతువును స్వాధీనం చేసుకుని.. ఇద్దర్ని అరెస్ట్ చేశారు.