హైద్రాబాద్, ఆగస్టు 11, 
లెబనాన్ రాజధాని బీరూట్‌లో జరిగిన పేలుడులో 200 మంది మరణించగా.. వేల సంఖ్యలో ప్రజలు క్షతగాత్రులైన సంగతి తెలిసిందే. నిల్వ ఉంచిన 2700 టన్నుల అమ్మోనియం నైట్రేట్ కారణంగా భారీ ఎత్తున పేలుడు సంభవించింది. అణుబాంబు దాడి తరహాలో విధ్వంసం చోటు చేసుకుంది. ఈ పరిణామం ప్రపంచ దేశాలు ఉలిక్కి పడ్డాయి. తమ దేశాల్లో అమ్మోనియం నైట్రేట్ నిల్వలు ఎక్కడైనా ఉన్నాయా అనే విషయం ఆరా తీస్తున్నాయి. మన దగ్గర సాగర ప్రాంత నగరాలైన చెన్నై, విశాఖల్లో అమ్మోనియం నైట్రేట్ భారీ స్థాయిలో నిల్వ ఉంది. ఐదేళ్ల క్రితం దక్షిణ కొరియా నుంచి దిగుమతి చేసుకున్న 740 టన్నుల అమ్మోనియం నైట్రేట్‌ను చైన్నై సమీపంలోని మనలిలో ఉన్న టెర్మినల్ వద్ద 37 కంటైనర్లలో నిల్వ ఉంచారు. కానీ గతంలో చెన్నై వరదల సమయంలో 50 టన్నుల మేర అమ్మోనియం నైట్రేట్ నీటిలో, గాల్లో కలిసిపోయినట్లు కస్టమ్స్ అధికారులు తెలిపారు.బీరూట్‌లో జరిగిన భారీ పేలుడుతో చెన్నై కస్టమ్స్ అధికారులు అప్రమత్తమయ్యారు. అక్కడ 37 కంటైనర్లలో అమ్మోనియం నైట్రేట్ ఉండగా.. 10 కంటైనర్లలోని 181 టన్నుల రసాయన మిశ్రమాన్ని హైదరాబాద్ తరలిస్తున్నారు. భాగ్యనగరానికి చెందిన ఓ సంస్థ ఈ అమ్మోనియం నైట్రేట్‌ను కొనుగోలు చేసింది. ఆదివారం సాయంత్రం అమ్మోనియం నైట్రేట్‌ను నిల్వ ఉంచిన మూడు కంటైనర్లు చెన్నై నుంచి హైదరాబాద్ బయల్దేరాయి. మరో రెండు రోజుల్లో మిగతా కంటైనర్లు కూడా హైదరాబాద్ చేరుకుంటాయి. అంతే కాదు మిగతా అమ్మోనియం నైట్రేట్‌ను కూడా దశల వారీగా హైదరాబాద్ తరలిస్తారు. పేలుడు స్వభావం ఉన్న అమ్మోనియం నైట్రేట్‌ను హైదరాబాద్ తరలిస్తుండటం పట్ల గవర్నర్ తమిళిసై సౌందర రాజన్ స్పందించారు. ప్రజల భద్రత విషయమై ఆమె ఆందోళన వ్యక్తం చేశారు. పరిస్థితిని సమీక్షించాలని, ఎప్పటికప్పుడు వివరాలను సేకరించాలని సంబంధిత అధికారులను ఆదేశించినట్లు ఆమె ట్వీట్ చేశారు. బీరూట్ దృశ్యాలు కళ్ల ముందు కదలాడుతుండటంతో.. చెన్నై నుంచి అమ్మోనియం నైట్రేట్ హైదరాబాద్ వస్తుండటం పట్ల నగరవాసులు కూడా ఆందోళనకు లోనవుతున్నారు.మరోవైపు సాగర నగరం విశాఖప్నటంలోనూ భారీగా అమ్మోనియం నైట్రేట్ నిల్వలు ఉన్నాయి. శరవణ్ షిప్పింగ్ సర్వీసెస్ ప్రైవేట్ లిమిటెడ్ 18,500 మెట్రిక్ టన్నుల అమ్మోనియం నైట్రేట్‌ను నిల్వ ఉంచింది. బీరూట్‌లో పేలుడు జరిగిన సమయంలో 2700 టన్నుల అమ్మోనియం నైట్రేట్ నిల్వ ఉందనే సంగతి తెలిసిందే. కాగా విశాఖలో నిల్వ ఉంచిన అమ్మోనియం నైట్రేట్ వల్ల అగ్ని ప్రమాదం సంభవించే అవకాశం లేదని జిల్లా అధికార యంత్రాంగం తెలిపింది. అమ్మోనియం నైట్రేట్‌ను నిల్వ ఉంచిన గోడౌన్‌ను స్థానిక అధికారులతో కూడిన కమిటీ తనిఖీ చేసింది. కానీ మరింత లోతుగా తనిఖీ చేపట్టాలని విపత్తు నిర్వహణ విభాగం సూచించింది. అదనపు ముందు జాగ్రత్త చర్యలు తీసుకోవాలని నిల్వ ఉంచిన కంపెనీని ఆదేశించింది.విశాఖపట్నంలో ఈ స్థాయిలో అమ్మోనియం నైట్రేట్ నిల్వ ఉండటానికి కారణం... మన దేశంలో ఈ రసాయన సమ్మేళనం దిగుతమయ్యే ఏకైక ఓడరేవు విశాఖ మాత్రమే. గతంలో విదేశాల నుంచి దేశంలోని మిగతా నౌకాశ్రయాలకు కూడా ఈ పదార్థం చేరేది. కానీ అమ్మోనియం నైట్రేట్‌ను కొన్ని నౌకాశ్రయాల నుంచి సురక్షితంగా గమ్య స్థానానికి చేర్చడం కష్టమని కేంద్రం గుర్తించింది. విశాఖపట్నం పోర్టులో మాత్రమే దిగుమతి చేసుకోవడానికి అనుమతి ఇచ్చింది. దీంతో దేశంలో ఏమూలన అమ్మోనియం నైట్రేట్ అవసరమైనా విశాఖ నుంచి తీసుకెళ్లాల్సిందే. ఏటా 2 లక్షల టన్నులకుపైగా అమ్మోనియం నైట్రేట్ విశాఖ పోర్టుకు దిగుమతి అవుతోంది.గతంలో అమ్మోనియం నైట్రేట్‌ను నౌకలో కుప్పలుగా పోసి తెచ్చేవారు. కానీ ప్రస్తుతం నిర్ణీత పరిమాణంలో బస్తాల్లో నింపి తెస్తున్నారు. ఆ బస్తాలు ఎవరికి చెందినవనే విషయాన్ని వాటిపై ముద్రిస్తున్నారు. దీంతోపాటు ఎంతమేర దిగుమతి అవుతోంది. అది ఎక్కడికి రవాణా అవుతోందనే విషయాలను కేంద్ర హోం శాఖ నిత్యం పర్యవేక్షిస్తుంది. అమ్మోనియం నైట్రేట్‌ దిగుమతైన వెంటనే విశాఖ పోర్టు అధికారులు బయటకు తరలిస్తారు. పోర్టుకు దూరంగా.. కేంద్రం అనుమతి ఇచ్చిన ప్రైవేట్ గోడౌన్లలో నిల్వ ఉంచుతున్నారు.అమ్మోనియం నైట్రేట్‌ ఎరువుల తయారీలో ఎక్కువగా ఉపయోగిస్తారు. గనులు, నిర్మాణ సమయంలో పేలుళ్ల కోసం కూడా దీన్ని ఉపయోగిస్తారు. నైట్రిక్ యాసిడ్‌తో అమ్మోనియా చర్యనొందడం ద్వారా అమ్మోనియం నైట్రేట్ ఏర్పడుతుంది. దీన్ని భారీ మొత్తంలో నిల్వ ఉంచినప్పుడు పేలుడు ముప్పు ఎక్కువ. అమ్మోనియం నైట్రేట్ గాల్లోని తేమను పీల్చుకొని పెద్ద రాయిలా మారుతుంది. ఆక్సీకరణ జరిగినప్పుడు వేడి పుట్టడం వల్ల మంటలు వచ్చి.. పేలుడు తలెత్తే ప్రమాదం ఉంది. ఇది పేలినప్పుడు నైట్రోజన్ ఆక్సైడ్, అమ్మోనియా లాంటి విష వాయువులు విడుదలవుతాయి.