విజయవాడ, ఆగస్టు 14, 
ఏపీ రాజధానికి సంబంధించి జగన్ సర్కార్ హైకోర్టులో కీలక అఫిడవిట్ దాఖలు చేసింది. రాజధాని నిర్ణయాధికారం రాష్ట్రానికి సంబంధించినదంటూ క్లారిటీ ఇచ్చింది. రాష్ట్ర విభజన అంశాలపై హైకోర్టులో దాఖలైన పిటిషన్‌పై ప్రభుత్వం అఫిడవిట్‌ సమర్పించింది. రాజధాని నిర్ణయం రాష్ట్రానిదేనని, కేంద్రం కూడా తన అఫిడవిట్‌లో ఇదే విషయాన్ని తేల్చి చెప్పిందని ప్రస్తావించింది. వికేంద్రీకరణ, సీఆర్‌డీఏ రద్దు చట్టాల తర్వాత ఈ అంశాలు సమీక్షార్హం కాదని, కార్యాలయాల తరలింపుపై లేవనెత్తిన అంశాలు న్యాయ సమీక్షార్హం కాదని ప్రభుత్వం అఫిడవిట్‌లో తెలిపింది. రాజధాని సహా అభివృద్ధి కోసం ప్రస్తుతం చేపట్టిన ప్రణాళికలు, ప్రాజెక్టులను సమీక్షించే అధికారం రాష్ట్ర ప్రభుత్వానికి ఉందని ప్రభుత్వం అంటోంది.మరోవైపు ఏపీకి ప్రత్యేక హోదా అంశాన్ని కూడా ప్రస్తావించారు. విభజన అంశాల్లో ఒకటైన ప్రత్యేక హోదా ఇస్తామని పార్లమెంట్‌ సాక్షిగా కేంద్రం వాగ్దానం చేసిందని, అది ఇప్పటి వరకు అమలు కాలేదని అఫిడవిట్‌లో ప్రభుత్వం ప్రస్తావించింది. కేంద్రంతో జరిగే ప్రతి భేటీలోనూ హోదా గురిచి అడుగుతున్నామని.. రాష్ట్ర విభజనలో ప్రత్యేక హోదా అంశం అనేది అంతర్భాగమని తెలిపింది. హోదా రానంత వరకు రాష్ట్ర విభజన ప్రక్రియ అసంతృప్తిగానే ఉంటుందన్నారు.రాష్ట్రానికి ప్రత్యేక హోదా ఇవ్వాలని, పునర్వ్యవస్థీకరణ చట్టంలోని నిబంధనల్ని అమలు చేసేలా కేంద్రాన్ని ఆదేశించాలని ప్రకాశం జిల్లాకు చెందిన శ్రీనివాసరావు హైకోర్టులో రెండేళ్ల క్రితం పిటిషన్‌ దాఖలు చేశారు. అలాగే రాజధానిని అమరావతి నుంచి తరలించరాదంటూ మరో అనుబంధ పిటిషన్‌ కూడా దాఖలు చేశారు. దీనిపై హైకోర్టు ఆదేశాల మేరకు రాష్ట్ర ప్రభుత్వం తరఫున మున్సిపల్‌ పరిపాలన, పట్టణాభివృద్ధిశాఖ ప్రత్యేక కార్యదర్శి వి.రామమనోహరరావు కౌంటర్‌ అఫిడవిట్‌ దాఖలు చేశారు.