న్యూఢిల్లీ, ఆగస్టు 17  
జేఈఈ, నీట్‌ పరీక్షలపై సుప్రీం కోర్టు కీలక వ్యాఖ్యలు చేసింది. జేఈఈ, నీట్‌ పరీక్షలను వాయిదా వేయలేమంటూ తేల్చి చెప్పింది. ముందుగా నిర్ణయించిన సెప్టెంబర్‌ నెలలో జేఈఈ, నీట్ పరీక్షలు జరుగుతాయని చెప్పింది. కరోనా పరిస్థితుల నేపథ్యంలో జేఈఈ, నీట్‌ పరీక్షలు వాయిదా వేయాలని దాఖలైన పిటిషన్‌పై సుప్రీం కోర్టు సోమవారం విచారణ చేపట్టింది.కరోనా భయాలతో అతి ముఖ్యమైన జేఈఈ, నీట్‌ పరీక్షలను వాయిదా వేసేందుకు నిరాక‌రించింది. పరీక్షలను వాయిదా వేయ‌డం వ‌ల్ల విద్యార్థులు నష్టపోతారని తెలిపింది. ఏడాదిపాటు అకడమిక్‌ ఇయ‌ర్‌ను విద్యార్థులు కోల్పోతార‌ని.. అది వారి భ‌విష్య‌త్తుపై ప్రభావం చూపిస్తుంద‌ని వ్యాఖ్యానించింది.పరీక్షల వాయిదాని కోరుతూ 11 మంది విద్యార్థులు వేసిన పిటిషన్‌ను జస్టిస్‌ అరుణ్‌ మిశ్రా నేతృత్వంలోని త్రిసభ్య ధర్మాసనం విచారించింది. కోవిడ్‌ జాగ్రత్తలు తీసుకుంటూ ముందుకు పోవాల్సిందే. మరో ఏడాది కూడా పరిస్థితుల్లో మార్పు రాకపోవచ్చు. ఇప్పుడు వైరస్‌ భయాలతో పరీక్షలు వాయిదా వేస్తే వచ్చే ఏడాది కూడా అలాంటి పరిస్థితే ఎదురు కావొచ్చు. అప్పుడు కూడా వాయిదా వేస్తారా?అని ధర్మాసనం వ్యాఖ్యానించింది.విద్యార్థుల పిటిష‌న్ త‌ర‌పు న్యాయ‌వాది అలోక్ శ్రీవాత్స‌వ్ వాదించారు. సీబీఎస్ఈ, ఐసీఎస్ఈ ప‌రీక్ష‌ల త‌ర‌హాలోనే నీట్‌, జేఈఈల‌ను కూడా వాయిదా వేయాల‌ని కోరారు. తామేమీ నిర‌వ‌ధిక వాయిదా కోర‌డం లేద‌న్నారు. నేష‌న‌ల్ టెస్టింగ్ ఏజెన్సీ(ఎన్‌టీఏ) త‌ర‌పున సోలిసిట‌ర్ జ‌న‌ర‌ల్ తుషార్ మెహ‌తా వాదించారు. ప‌రీక్ష‌ల నిర్వ‌హ‌ణ స‌మ‌యంలో అన్ని జాగ్ర‌త్త‌లు తీసుకుంటామ‌న్నారు.సెప్టెంబ‌ర్ 1 నుంచి 6వ తేదీ వ‌ర‌కు జేఈఈ మెయిన్స్, సెప్టెంబ‌ర్ 13న నీట్‌ను దేశవ్యాప్తంగా నిర్వహించేందుకు ఇప్పటికే ప్రణాళికలు సిద్ధం చేశారు. ఈ తేదీల ప్రకారమే నీట్‌, జేఈఈ పరీక్షలు జరుగుతాయి.