హైద్రాబాద్, ఆగస్టు 20, 
ఆంధ్రప్రదేశ్ ప్రభుత్వం వ్యవహరిస్తున్న తీరుపై తెలంగాణ ముఖ్యమంత్రి కేసీఆర్ మరోసారి ఆగ్రహం వ్యక్తం చేశారు. రాయలసీమ ఎత్తిపోతల ప్రాజెక్టును గట్టిగా వ్యతిరేకించాలని ఆయన అధికారులకు సూచించారు. ఈ నెల 25న అపెక్స్ కౌన్సిల్ సమావేశం నిర్వహించాలన్న కేంద్ర ప్రభుత్వ నిర్ణయాన్ని స్వాగతించిన ముఖ్యమంత్రి కేసీఆర్, పలు అంశాలపై అధికారులకు దిశానిర్దేశం చేశారు. ఈ సమావేశంలో ఆ ప్రాజెక్టుపై గట్టిగా అభ్యంతరం చెప్పాలని నిర్ణయించారు. అపెక్స్‌ కౌన్సిల్‌ సమావేశంలో అనుసరించాల్సిన వ్యూహం ఖరారుచేసేందుకు సీఎం కేసీఆర్‌ బుధవారం ప్రగతిభవన్‌లో సమీక్ష నిర్వహించారు.
వీటికి సంబంధించిన సమగ్ర సమాచారాన్ని, అవసరమైన పత్రాలను సిద్ధంచేయాలని అధికారులను ఆదేశించారు. కేంద్ర ప్రభుత్వంగానీ, ఏపీ ప్రభుత్వంగానీ తెలంగాణ ప్రాజెక్టుల విషయంలో వ్యక్తంచేసిన అభ్యంతరాలన్నీ అర్థంలేనివే అని కేసీఆర్ అన్నారు. అపెక్స్‌ కౌన్సిల్‌ సమావేశం విషయంలో తమ సంసిద్ధతను వ్యక్తంచేస్తూ కేంద్రానికి లేఖ రాయాలని సీఎం కేసీఆర్‌ నిర్ణయించారు. అజెండాలో చేర్చాల్సిన అంశాలనూ ఆ లేఖలో పేర్కొంటామని చెప్పారు.నిజానికి తెలంగాణలో కొత్త ప్రాజెక్టులేవీ చేపట్టలేదని, ఉమ్మడి ఆంధ్రప్రదేశ్‌లో చేపట్టిన వాటినే తెలంగాణ అవసరాలు తీర్చేలా రీడిజైన్‌ చేశామని కేసీఆర్ చెప్పారు. ఆయా ప్రాజెక్టులు ఎప్పుడు మంజూరయ్యాయి? ఎన్ని నిధులు కేటాయించారు? తెలంగాణ వచ్చేనాటికి ఎంత ఖర్చుచేశారు? ఎంత భూమి సేకరించారు? ఎన్ని టీఎంసీలు కేటాయించారు? తదితర వివరాలను సిద్ధం చేయాలని అధికారులను ఆదేశించారుఈ సమీక్షలో ప్రభుత్వ ముఖ్య సలహాదారు రాజీవ్‌శర్మ, జల వనరులశాఖ సలహాదారు ఎస్కే జోషి, రాష్ట్ర ప్రణాళికా సంఘం ఉపాధ్యక్షుడు బీ వినోద్‌కుమార్‌, రైతుబంధు సమితి రాష్ట్ర అధ్యక్షుడు పల్లా రాజేశ్వర్‌రెడ్డి, ఎమ్మెల్సీ సుభాశ్‌రెడ్డి, ప్రభుత్వ ప్రధాన కార్యదర్శి సోమేశ్‌కుమార్‌, జల వనరులశాఖ ముఖ్య కార్యదర్శి రజత్‌కుమార్‌ తదితరులు పాల్గొన్నారు.