ముంబై, ఆగస్టు 20, 
కరోనా వైరస్ ఎప్పటికప్పుడు కొత్త రూపాన్ని ఏర్పరచుకుంటున్నట్టు పరిశోధనలు వెల్లడిస్తున్నాయి. తాజాగా, జర్మనీ శాస్త్రవేత్తల పరిశోధనలో ఆసక్తికర విషయలు వెలుగులోకి వచ్చాయి.కరోనా వైరస్ మహమ్మారి ఎప్పటికప్పుడు తన రూపాన్ని మార్చుకుంటూ శాస్త్రవేత్తలకు అంతుబట్టకుండా తప్పించుకుంటూ ప్రజల ప్రాణాలను హరిస్తోంది. మానవ శరీరంలోని డీఎన్‌ఏను ఏమార్చి ఓ ఎంజైమును విడుదల చేస్తున్నట్టు జర్మనీ శాస్త్రవేత్తల పరిశోధనలో వెల్లడయ్యింది. తాజాగా, శరీరం విడుదల చేసే యాంటీబాడీలకు చిక్కకుండా వైరస్‌లోని కీలకమైన స్పైక్ ప్రొటీన్‌కు చక్కెర వంటి అణువులు రక్షణ కవచంలా ఏర్పడుతున్నట్టు తేలింది.జర్మనీకి చెందిన మాక్స్ ప్లాంక్ ఇనిస్టిట్యూట్ ఆఫ్ బయోఫిజిక్స్, యూరోపియన్ మాలిక్యూలర్ బయాలజీ ల్యాబొరేటరీ, ది పాల్ హెర్లిచ్ ఇన్‌స్టిట్యూట్, గోథే యూనివర్సిటీ సంయుక్తంగా ఈ అధ్యయనం చేపట్టాయి. కరోనా వైరస్‌పై ఉండే స్పైక్ (కొమ్ము) ప్రొటీన్ మానవ కణాలను గుర్తించి, వాటిని లక్ష్యంగా చేసుకుంటున్నట్టు గుర్తించారు. ఈ స్పైక్‌లపై చక్కెరలాంటి గ్లైకాన్లు అతుక్కుని ఉంటున్నాయని, ఒక్కో కొమ్ముపై మూడేసి అతుకులు ఉంటున్నాయని పరిశోధకులు పేర్కొన్నారు.స్పైక్ ప్రొటీన్‌లోని తుంటి, మోకాలు, చీల మండలం వంటి భాగాల కారణంగా వైరస్ స్వేచ్ఛగా వంగుతోందని తెలిపారు. శరీరంలోని యాంటీబాడీలు వీటిని గుర్తించే సమయంలో ఈ స్పైక్ ప్రొటీన్‌కు గ్లైకాన్లు రక్షణ కవచంలా అడ్డు నిలుస్తున్నాయని శాస్త్రవేత్తలు వివరించారు. వ్యాక్సిన్ల అభివృద్ధి, బాధితులకు సమర్థవంతమైన చికిత్సా విధానాన్ని ఉపయోగించే అంతర్గత అంశాలను తెలుసుకోడానికి వైరస్ ఉపరితల నిర్మాణంపై దృష్టి పెట్టినట్టు పరిశోధకులు తెలిపారు.ప్రోటీన్ వలయాకార భాగం స్పైక్‌కు అనుసంధానం చేస్తున్నట్టు పరిశోధనలో గుర్తించారు. ‘స్పైక్ ఎగువ భాగం వ్యాక్సిన్ అభివృద్ధికి ఉపయోగించే పునః సంయోగ ప్రోటీన్ల ద్వారా పునరుత్పత్తి చేసే నిర్మాణాన్ని కలిగి ఉందని పరిశోధనకు నాయకత్వం వహించిన మాక్స్ ప్లాంక్ ఇన్‌స్టిట్యూట్ డైరెక్టర్ మార్టిన్ బెక్ వివరించారు. వైరస్ స్పైక్ చాలా కఠినంగా ఉంటుందని భావిస్తున్నామని, దీని కాండాలు చాలా సరళమైనవి అని కనుగొన్నామని గోథే యూనివర్సిటీ ఎంపీఐకి చెందిన గెర్హార్డ్ హమ్మర్ అన్నారు.