శ్రీకాకుళం, ఆగస్టు24 
ప్రజలకు రక్షణగా ఉండాల్సిన పోలీసే కామాంధుడిగా మారాడు. అక్రమ మద్యం కేసులో అదుపులోకి తీసుకున్న మహిళపై కన్నేసిన ఎస్ఐ తన కామవాంఛ తీర్చాలంటూ వేధిస్తున్నాడు. తన ఇంటికి వచ్చిర కోరిక తీరిస్తే కేసు నుంచి తప్పిస్తానంటూ బేరసారాలు నడుపుతున్నాడు. బాధితురాలితో ఎస్ఐ మాట్లాడిన ఆడియో కాల్ బయటకు రావడంతో ఆ కీచకుడి గుట్టు రట్టయింది. దీనిపై స్పందించిన పోలీసు ఉన్నతాధికారులు క్రమశిక్షణ చర్యలు కింద ఎస్ఐని సస్పెండ్ చేశారు.శ్రీకాకుళం జిల్లా పొందూరు మండలం రాపాక జంక్షన్ వద్ద ఓ మహిళ కిరాణా దుకాణం నడుపుతోంది. ఆమె అక్రమంగా మద్యం విక్రయిస్తోందన్న సమాచారంతో పొందూరు ఎస్ రామకృష్ణ ఇటీవల ఆమె దుకాణంలో తనిఖీలు చేపట్టారు. ఈ సందర్భంగా దుకాణంలో 11 మద్యం సీసాలు దొరికారు. దీంతో పోలీసులు ఆమెను స్టేషన్‌కు తీసుకెళ్లి రోజంతా కూర్చోబెట్టారు. ఓ శుభకార్యం కోసం మద్యాన్ని కొనుగోలు చేసి తన దుకాణంలో ఉంచానని, ఈసారికి వదిలిపెట్టాలని ఆ మహిళ ఎస్ఐ రామకృష్ణను వేడుకుంది. మధ్య వయస్కురాలైన ఆమెను చూడగానే ఎస్ఐలో కామవాంఛ పెరిగింది.‘నువ్వుంటే నాకిష్టం. యాతవీధిలోని నా ఇంటికి పిలిచినప్పుడల్లా వచ్చి కోరిక తీర్చి వెళ్లు. నీ మీద కేసు లేకుండా చేస్తాను’ అని ఎస్ఐ రామకృష్ణ ఆమెతో అసభ్యంగా మాట్లాడాడు. ఏదో పొట్టకూటి కోసం కిరాణా దుకాణం నడుపుకుంటున్నానని, తాను అలాంటి దానిని కాదని, వదిలిపెట్టాలని ఆమె వేడుకున్నా ఎస్ఐ వదల్లేదు. ఆమె ఫోన్ నంబర్ తీసుకుని పదేపదే కాల్స్ చేస్తూ ఇంటికి రావాలంటూ వేధించసాగాడు.అతడి వేధింపులతో విసిగిపోయిన బాధితురాలు ఎస్ఐ మాట్లాడిన ఆడియో కాల్‌ను రికార్డ్ చేసి మీడియాకు అందజేయడంతో అతడి బండారం బయటపడింది. ఈ విషయం మీడియాలో ప్రచారం కావడంతో ఉన్నతాధికారులు సీరియస్‌గా తీసుకున్నారు. క్రమశిక్షణ చర్యల్లో భాగంగా ఎస్ఐ రామకృష్ణను సస్పెండ్ చేస్తున్నట్లు సోమవారం ఉత్తర్వులు జారీచేశారు.