న్యూఢిల్లీ, ఆగస్టు 26 
షెడ్యూల్‌ ప్రకారమే జేఈఈ మెయిన్‌, నీట్‌ యూజీ పరీక్షలు జరుగుతాయని కేంద్రం స్పష్టం చేసింది.కరోనా ప్రభావాన్ని దృష్టిలో ఉంచుకొని వచ్చే నెలలో తలపెట్టిన జేఈఈ మెయిన్‌, నీట్‌ యూజీ పరీక్షలను వాయిదా వేయాలని వివిధ రాష్ట్రాల ముఖ్యమంత్రులు, ప్రముఖులు, సామాజిక ఉద్యమకారులు చేసిన విజ్ఞప్తిని నేషనల్‌ టెస్టింగ్‌ ఏజెన్సీ(ఎన్‌టీఏ), కేంద్రం పరిగణనలోకి తీసుకోలేదు. ఇదివరకు నిర్ణయించిన షెడ్యూల్‌ ప్రకారమే సెప్టెంబర్‌ 1-6 తేదీల మధ్యలో జేఈఈ మెయిన్‌, సెప్టెంబర్‌ 13న నీట్‌ యూజీ పరీక్షలు జరుగుతాయని స్పష్టం చేసింది.నీట్‌, జేఈఈ పరీక్షలను నిర్వహించాలని విద్యార్థుల తలిదండ్రులు, విద్యార్థులు కూడా కోరుతున్నారని విద్యాశాఖ మంత్రి రమేష్ పోఖ్రియాల్ నిషాంక్ తెలిపారు. ఇప్పటికే 80 శాతం మంది స్టూడెంట్స్ జేఈఈ ఎగ్జామ్స్ కోసం అప్పుడే అడ్మిట్ కార్డులను డౌన్ లోడ్ చేసుకున్నారని చెప్పారు.జేఈఈ కోసం రిజిస్టర్ చేసుకున్న 8.5 లక్షల మంది విద్యార్థుల్లో 7.25 లక్షలమంది అడ్మిట్ కార్డులను డౌన్ లోడ్ చేసుకోవడం చూస్తే, వారి ఆసక్తి ఎంతగా ఉందో అర్థమవుతోందని రమేష్ పోఖ్రియాల్ అన్నారు. మాకు విద్యార్థుల భవిష్యత్తు ముఖ్యం అని పేర్కొన్నారు. స్కూళ్లను మళ్ళీ ప్రారంభించే విషయమై.. హోమ్, ఆరోగ్య మంత్రిత్వ శాఖల గైడ్ లైన్స్ ప్రకారం తాము నిర్ణయం తీసుకుంటామని స్పష్టం చేశారు.