న్యూఢిల్లీ, ఆగస్టు 27, 
మహిళల వివాహ వయసు పెంపుపై కేంద్రం చేస్తున్న ప్రయత్నాలకు అభ్యంతరాలు వ్యక్తమవుతున్నాయి. అమ్మాయిల వివాహ వయసు పెంచొద్దంటూ వందకుపైగా పౌర సంఘాలు కేంద్ర ప్రభుత్వాన్ని కోరాయి. వయో పరిమితిని పెంచడం వల్ల మహిళలకు ఒనగూరే ప్రయోజనాల కంటే నష్టమే ఎక్కువ జరుగుతుందని పేర్కొన్నాయి. ప్రస్తుతమున్న 18 ఏళ్ల కనీస వివాహ వయసును పెంచే యోచనలో ఉన్న కేంద్రం.. దీనిపై ప్రత్యేక టాస్క్‌ఫోర్స్ కూడా ఏర్పాటుచేసింది. ఈ ఏడాది స్వాతంత్య్ర దినోత్సవ ప్రసంగంలో కూడా ప్రధాని నరేంద్ర మోదీ ఈ విషయాన్ని ప్రస్తావించారు.అయితే వయో పరిమితి పెంపు వల్ల మహిళలు మరిన్ని సమస్యలు ఎదుర్కొనే అవకాశం ఉందని పౌర సంఘాలు అభిప్రాయం వ్యక్తం చేస్తున్నాయి. పురుషులతో పాటు.. మహిళల వివాహ వయసును కూడా 21 ఏళ్లకు పెంచితే స్త్రీ-పురుష సమానత్వం రాదని.. పైగా మహిళా సాధికారతకు భంగం వాటిల్లుతుందని అంటున్నాయి. వీలైతే పురుషుల వివాహ కనీస వయసును కూడా 18 సంవత్సరాలకు తగ్గించాలని.. ప్రపంచంలో చాలా దేశాలు ఈ పద్ధతిని అనుసరిస్తున్నాయని సూచించాయి.వయో పరిమితి పెంచే బదులు.. మహిళల ఉపాధికి చర్యలు తీసుకోవాలని కోరాయి. వివాహ వయసును పెంచడం వల్ల బాల్య వివాహాలు ఆగిపోవని.. పైగా తల్లిదండ్రులపై ఆర్థిక భారం పడుతుందని అన్నాయి. వయో పరిమితి పెంచడం వల్ల మహిళ, ఆమెకు పుట్టబోయే బిడ్డ ఆరోగ్యంలో స్వల్ప మెరుగుదల ఉంటుందని అభిప్రాయపడ్డాయి. మహిళల వివాహ స్థితి, హక్కులను నిరాకరించినప్పుడు కనీస వయస్సును పెంచడం వల్ల ప్రయోజనం ఏముంటుందని పౌర సంఘాలు సంయుక్త ప్రకటనలో పేర్కొన్నాయి.‘గత కొన్నేళ్లుగా చట్టపరమైన మార్పుల ద్వారా లక్ష్యాలను సాధించగలిగినట్లుగా చట్టాలను మరింత కఠినతరం చేయాలి.. ఉన్నత విద్య, మంచి ఉద్యోగ కల్పన రూపంలో అవకాశాలను కల్పించకుండా 21 ఏళ్లు మహిళలకు కనీస వయస్సు వివాహ చట్టం కలిగి ఉండటం వల్ల యువతులు వారి తల్లిదండ్రుల ఇళ్లలోనే మరింత చిక్కుకుపోతారు’ వ్యాఖ్యానించాయి.కౌమారదశలో ముఖ్యంగా బాలికలలో పోషకాహార లోటును పరిష్కరించడానికి అంగన్‌వాడీలు, పాఠశాలల్లో కార్యక్రమాలను బలోపేతం చేయడం, అసురక్షిత గర్భస్రావం, వైద్య పద్ధతులను నివారించడంతో సహా అందరికీ ఆరోగ్యం, గర్భనిరోధకం, గర్భస్రావం సేవలకు విస్తృత ప్రాధాన్యత ఇవ్వాలని పేర్కొన్నాయి