కడప ఆగస్టు 29, 
కడప జిల్లా పులివెందుల పోలీసులపై ప్రశంసల వర్షం కురిసింది. అక్రమార్కుల ఆట కట్టించేందుకు చేజింగ్ లు, ప్రాణాలకు తెగించి పోరాటాలు చివరికి అరెస్ట్ చేయడాన్ని సినిమాల్లో చూస్తుంటాం. కాని పులివెందులలో సినిమా తరహాలో యదార్థ సంఘటన పులివెందులలో చోటుచేసుకుంది. ఒక  కారులో తెలంగాణ అక్రమ మద్యం  తీసుకెళ్తూ ఎస్సై బండిని ఢీ కొట్టారు. దాంతో ఆగకుండా అతి వేగంగా కారును పరిగెత్తించాడు. దాంతో సదరు ఎస్సై కారు  టాప్ పైకి చేరుకొని వేలాడాడు. అయినా కారు మరికొంత దూరం పోయింది.  ప్రాణాలు సైతం లెక్క చేయకుండా ఆ ఎస్సై  అక్రమార్కుల ఆట కట్టించాడు.  అతివేగంగా వెళ్తున్న ఆ కారు టాప్ పై ఉన్న సబ్ ఇన్స్పెక్టర్ ను చూసి ప్రజలు ఆశ్చర్యపోయారు.  ప్రాణాలకు తెగించి  పోరాట పటిమను చూసి శభాష్ పోలీస్...ఇలాంటి పోలీసే.. మాకు కావాలి అంటూన్నారు. ఆ సబ్ ఇన్స్పెక్టర్ పులివెందుల  అర్బన్ ఎస్ఐ గా విధులు నిర్వహిస్తున్న గోపీనాథ్ రెడ్డి.  ప్రాణాలు సైతం పణంగా పెట్టి నేరస్తులను పట్టుకునేందుకు కృషి చేసిన ఎస్.ఐ గోపీనాధ్ రెడ్డి ని జిల్లా ఎస్.పి కే.కే.ఎన్ అన్బు రాజన్ ప్రత్యేకంగా అభినందించారు.