న్యూఢిల్లీ, సెప్టెంబర్ 3, 
జులై నెలలో పెద్ద ఎత్తున ప్రపంచవ్యాప్తంగా ప్రముఖుల ఖాతాలను హ్యాక్ చేసిన విషయం తెలిసిందే. తాజాగా, ప్రధాని నరేంద్ర మోదీ వ్యక్తిగత ఖాతాను కూడా సైబర్ నేరగాళ్లు హ్యాక్ చేశారు.ప్రధాని నరేంద్ర మోదీ వ్యక్తిగత ట్విట్టర్ ఖాతా హ్యాకింగ్‌కు గురైంది. మోదీ వ్యక్తిగత ఖాతా హ్యకింగ్‌కు గురైనట్టు ట్విట్టర్ ప్రతినిధులు వెల్లడించారు. దీనిపై అధికారులు దర్యాప్తు చేపట్టారు. గురువారం తెల్లవారుజామున 3.15 గంటలకు ట్విట్టర్ ఖాతాను హ్యాక్ చేసినట్టు తెలిపారు. ‘ఈ ఖాతాను జాన్ విక్ (hckindia@tutanota.com)హ్యాక్ చేశాం.. మేము పేటీఎమ్ మాల్‌ను హ్యాక్ చేయలేదు’ అని ప్రధాని ట్విట్టర్‌ ఖాతాలో పోస్ట్ పెట్టారు. గతంలోనూ ఖాతాను హ్యాక్ చేసి.. క్రిప్టోకరెన్సీ ద్వారా ప్రధాని నేషనల్ రిలీఫ్ ఫండ్‌కు విరాళం ఇవ్వమని వరుస ట్వీట్లు పెట్టారు. అప్పటి నుంచి అదే తీసివేయబడింది.
ప్రధాని నరేంద్ర మోదీ ట్విట్టర్ ఖాతా హ్యకింగ్‌కు గురైన విషయం తమకు తెలుసునని, దీని రక్షణకు చర్యలు తీసుకుందని ట్విట్టర్ ప్రతినిధులు తెలిపారు. ‘మేము పరిస్థితిని చురుకుగా పరిశీలిస్తున్నాం. ఈ సమయంలో, అదనపు ఖాతాలు ప్రభావితమవుతాయని భావించడంలేదు’ అని ట్విట్టర్ ప్రతినిధి ఒకరు తెలిపారు.సోషల్ మీడియా దిగ్గజం ట్విట్టర్‌ చరిత్రలో ఎన్నడూ లేని విధంగా పెద్ద ఎత్తున ప్రముఖుల, దిగ్గజ సంస్థల ఖాతాలు ఈ ఏడాది జులై‌లో హ్యాక్‌‌కు గురయిన విషయం తెలిసిందే. ప్రముఖుల ఖాతాలను హ్యాక్ చేసి.. వారి పేరుతో ట్వీట్ చేసిన సైబర్ నేరగాళ్లు.. బిట్‌ కాయిన్ స్కామ్‌కు ప్రయత్నించారు. వెంటనే బిట్‌కాయిన్స్‌ పంపితే, అందుకు రెట్టింపు మొత్తాన్ని తిరిగి పొందవచ్చని హ్యాకర్లు ఆ ఖాతాల్లో పేర్కొన్నారు.అమెరికా మాజీ అధ్యక్షుడు బరాక్ ఒబామా, ప్రస్తుతం అమెరికా అధ్యక్ష ఎన్నికల్లో డెమోక్రాట్స్ అభ్యర్థి జో బిడెన్, మైక్రోసాఫ్ట్ సహ-వ్యవస్థాపకుడు బిల్ గేట్స్, టెస్లా సీఈవో ఎలన్ మస్క్, అమెజాన్ వ్యవస్థాపకుడు జెఫ్ బెజోస్, వ్యాపార దిగ్గజం వారెన్ బఫెట్‌ సహా పలువురు ప్రముఖుల ఖాతాలను ఈ విధంగా హ్యాక్ చేశారు.అలాగే, యాపిల్, ఉబెర్ సంస్థలతో పాటు హిప్-హాప్ మొగల్ కాన్యే వెస్ట్, న్యూయార్క్ నగర మాజీ మేయర్‌, బిలియనీర్ మైక్ బ్లూమ్‌బర్గ్ వంటి వారి ఖాతాలు కూడా హ్యాకర్ల బారినపడ్డాయి. జెమిని క్రిప్టో కరెన్సీ ఎక్స్చేంజ్, కాయిన్ ఎంబేస్ యాప్‌, టైలర్ వింక్లివోస్ వంటి క్రిప్టో సంస్థల ఖాతాలను హ్యాక్ చేశారు.తొలుత టెస్లా సీఈవో ఎలన్ మస్క్ ఖాతాలో బిట్‌ కాయిన్‌ స్కామ్‌కు పాల్పడేందుకు హ్యాకర్లు చేసిన ట్వీట్లు కనపడ్డాయి. ఆ తర్వాత వెంటనే బిల్‌గేట్స్‌ ఖాతాలోనూ ఇటువంటి ట్వీట్లే కనిపించాయి. ‘ఈ ట్వీట్‌ను బిల్‌గేట్స్‌ చేయలేదు. ట్విట్టర్‌లో తలెత్తిన లోపం కారణంగా ఈ ట్వీట్లు కనపడినట్లు తెలుస్తోంది’ అని బిల్‌గేట్స్‌ ప్రతినిధి రికోడ్స్‌ టెడ్డీ తెలిపారు