చెన్నై,  సెప్టెంబ‌ర్ 11, 
‌దేశానికి తిండి పెట్టే రైతులకు కాస్త సాయం అందించడం కోసం కేంద్ర ప్రభుత్వం ప్రవేశపెట్టిన పథకం ప్రధానమంత్రి కిసాన్ స‌మ్మాన్ నిధి. అన్నదాతల సంక్షేమానికి ఉద్దేశించిన ఈ ప‌థకానికి సంబంధించిన నిధుల్లో రూ.110 కోట్ల మేర‌ అవినీతి జ‌రిగింది. తమిళనాడు రాష్ట్రంలో ఇది వెలుగులోకి వచ్చింది. మొత్తం 5.5 ల‌క్షల మంది అన‌ర్హుల ఖాతాల్లో ఒక్కొక్కరికి రూ.2000 చొప్పున రూ.110 కోట్లను జ‌మ‌చేశారు.‌ ఇవన్నీ ఫేక్ అకౌంట్లేనని అధికారులు అనుమానిస్తున్నారు. ఈ భారీ కుంభకోణంపై తమిళనాడు ప్రభుత్వం సీబీసీఐడీ ద‌ర్యాప్తున‌కు ఆదేశించింది.ఈ కుంభకోణం వెనుక పలువురు ప్రభుత్వ అధికారులు ఉన్నట్లు భావిస్తున్నారు. ఉన్నతాధికారుల హస్తంతోనే ఇదంతా జరిగినట్లు అనుమానిస్తున్నారు. రైతుల బ్యాంకు ఖాతాల్లో ఆర్థిక సాయం జమ చేసే ఈ పథకంలో అక్రమాలు జరిగాయని, పలు జిల్లాల్లో నకిలీ పత్రాలతో రైతుల పేరిట కోట్ల రూపాయలు కొల్లగొట్టినట్లు అధికారుల దృష్టికి వచ్చింది.ఈ కుంభకోణం తొలుత కడలూరులో బయటపడింది. రైతులు కాని 100 మంది ఖాతాల్లో పీఎం కిసాన్ సమ్మాన్ నిధులు జమ అయినట్లు కడలూరు కలెక్టర్ గుర్తించారు. దీనిపై విచారణకు ఆదేశించడంతో డొంకంతా కదులుతోంది.ఈ కుంభకోణం విషయంలో అవినీతి ఆరోప‌ణ‌లు ఎదుర్కొంటున్న 34 అధికారుల‌పై చ‌ర్యలు చేప‌ట్టినట్లు త‌మిళ‌నాడు వ్యవ‌సాయ శాఖ ముఖ్య కార్యద‌ర్శి గ‌గ‌న్‌దీప్ సింగ్ బేడీ తెలిపారు. ఇప్పటికే 20 మంది ఉద్యోగుల‌ను అరెస్ట్ చేసినట్లు తెలిపారు. మ‌రో 80 మంది తాత్కాలిక సిబ్బందిని డిస్మిస్‌ చేసినట్లు చెప్పారు. రాష్ట్రంలోని 13 జిల్లాల్లో ఈ తరహా మోసం జరిగినట్లు తమకు ఫిర్యాదులు అందాయని ఆయన వెల్లడించారు. కలకురిచి, విల్లుపురం, కడలూరు, తిరువన్నమలై, వెల్లూరు, రాణిపేట, సేలం, ధర్మపురి, కృష్ణగిరి, చెంగల్‌పేట జిల్లాల్లో ఈ తరహా మోసం జ‌రిగింద‌ని తెలిపారు.మొత్తం రూ.110 కోట్ల కుంభకోణానికి సంబంధించి ప్రభుత్వం ఇప్పటికే రూ.32 కోట్లను స్వాధీనం చేసుకుందని.. మరో 40 రోజుల్లో మిగిలిన డబ్బును కూడా రిక‌వ‌రీ చేస్తామ‌ని గ‌గ‌న్‌దీప్ సింగ్ తెలిపారు. మరోవైపు.. ఈ కుంభ‌కోణంపై ప్రతిప‌క్ష డీఎంకే తీవ్ర స్థాయిలో విమర్శలు గుప్పిస్తోంది. సీబీఐ ద‌ర్యాప్తు జ‌రిపించాల‌ని డిమాండ్ చేస్తోంది