న్యూఢిల్లీ, సెప్టెంబర్ 16  
రాజకీయ నాయకులు, ప్రజా ప్రతినిధులపై 4,400పైగా క్రిమినల్ కేసులు ఉన్నట్టు ఇటీవల సుప్రీంకోర్టుకు ఆయా హైకోర్టులు నివేదిక సమర్పించిన విషయం తెలిసిందే. తాజాగా, ఈ కేసుల విచారణను  ఏడాదిలోపు పూర్తి చేయాలన్న పిటిషన్‌పై జస్టిస్‌ ఎన్వీ రమణ నేతృత్వంలోని త్రిసభ్య ధర్మాసనం బుధవారం విచారణ చేపట్టింది. ఈకేసులో అమికస్‌ క్యూరీగా వ్యవహరిస్తోన్న విజయ్ హన్సారియా  తాజాగా మరొక సప్లిమెంటరీ నివేదికను సుప్రీంకోర్టుకు అందజేశారు. ఆయా రాష్ట్రాల హైకోర్టులు ఇచ్చిన సమాచారం ఆధారంగా సప్లిమెంటరీ నివేదిక ఇచ్చినట్టు పేర్కొన్నారు.ఇందులో తెలంగాణకు  సంబంధించి మొత్తం 118 కేసులు తాజా, మాజీ ప్రజాప్రతినిధులపై పెండింగ్‌లో ఉన్నాయని వివరించారు. ఒక్క హైదరాబాద్‌లోనే ప్రజాప్రతినిధులపై 13 సీబీఐ కేసులు పెండింగ్‌లో ఉన్నట్టు తన  నివేదికలో పేర్కొన్నారు. అందులో ఒక ఎమ్మెల్యేపై యావజ్జీవిత ఖైదు విధించే స్థాయి కేసు విచారణలో ఉందని ధర్మాసనానికి తెలిపారు. పలు రాష్ట్రాల్లో రాజకీయ నేతలపై కేసుల విచారణకు ప్రత్యేక  కోర్టులు ఏర్పాటు చేయగా.. హైదరాబాద్‌లో సీబీఐ, ఈడీ కోర్టులలో కొన్ని కేసులు పెండింగ్‌లో ఉన్న విషయాన్ని ఆయన కోర్టు దృష్టికి తెచ్చారుప్రజాప్రతినిధులపై ఉన్న కేసుల సత్వర విచారణకు  ఎలాంటి సూచనలు చేస్తారని జస్టిస్‌ ఎన్వీ రమణ నేతృత్వంలోని ధర్మాసనం కోరగా.... సత్వర విచారణ కోసం జిల్లాకు ఒక ప్రత్యేక కోర్టు ఏర్పాటు చేస్తే బాగుంటుందని అమికస్‌ క్యూరీ సూచించారు. కొన్ని  రాష్ట్రాల్లో రెండు, మూడు కేసులే ఉంటాయి కాబట్టీ అలాంటి వాటికి సంబంధించి రాష్ట్ర హైకోర్టులకు కొన్ని ఆదేశాలు ఇస్తామని ధర్మాసనం స్పష్టం చేసింది. సీబీఐ, ఈడీ నమోదు చేసిన కొన్ని కేసుల్లో  ఎఫ్ఐఆర్‌ నమోదు చేశారు కానీ, విచారణ ఇంకా ప్రారంభం కాలేదని పేర్కొన్నారు.ఈ కేసుల విచారణపై ట్రయల్‌ కోర్టులకు ఆదేశాలు ఇవ్వాలని సూచించారు. ప్రజాప్రతినిధులపై ఉన్న కేసుల సత్వర  విచారణకు తాము సుముఖంగానే ఉన్నామని, కోర్టు ఎలాంటి ఆదేశాలు ఇచ్చినా అమలు చేస్తామని కేంద్రం తరఫున హాజరైన సోలిసిటర్‌ జనరల్‌ తుషార్‌ మెహతా వ్యాఖ్యానించారు.అయితే, ప్రత్యేక  కోర్టులు, మౌలిక వసతుల కల్పనకు హైకోర్టులకు రెండు నెలల సమయం ఇవ్వాలని కోరారు. అమికస్‌ క్యూరీ, సోలిసిటర్‌‌ జనరల్‌ చేసిన సూచనలు పరిగణనలోకి తీసుకుని.. ప్రజాప్రతినిధులపై ఉన్న  కేసుల విచారణను త్వరగా పూర్తి చేసేందుకు హైకోర్టు, ట్రయల్‌ కోర్టులకు రేపటిలోగా కొన్ని ఆదేశాలు జారీ చేస్తామని ధర్మాసనం స్పష్టం చేసింది. ప్రజాప్రతినిధులు దోషిగా తేలితే.. ఎన్నికల్లో  పోటీచేయకుండా జీవితకాలం నిషేదం విధించాలని అశ్వినీకుమార్‌ ఉపాధ్యాయ కోరగా... ఈ అంశాన్ని తర్వాత పరిశీలిస్తామని ధర్మాసనం తెలిపింది.ప్రత్యేక కోర్టులతో సహా వివిధ కోర్టులలో సిట్టింగ్,  మాజీ ఎంపీలు లేదా ఎమ్మెల్యేలపై మొత్తం 4,442 కేసులు పెండింగ్‌లో ఉన్నాయి. వీటిలో 2,556 కేసులు సిట్టింగ్ ప్రజాప్రతినిధులపై ఉన్నాయి. యావజ్జీవిత ఖైదు శిక్షార్హమైన తీవ్ర నేరాలకు  సంబంధించి 413 కేసులు కాగా.. ఇందులోని 174 కేసులలో సిట్టింగ్ ఎంపీలు లేదా ఎమ్మెల్యేలు నిందితులుగా ఉన్నారు.