తిరువ‌నంతపురం, సెప్టెంబ‌ర్ 29,
దేశంలో తొలి కరోనా కేసు నమోదైంది కేరళ రాష్ట్రంలోనే. తొలి మరణమూ అక్కడే సంభవించింది. వరదలతో అతలాకుతలమైన కేరళలో మరోసారి భారీగా ప్రాణనష్టం తప్పదని అందరూ భావించారు. కానీ, ప్రభుత్వం కట్టుదిట్టమైన చర్యలతో వైరస్‌ను కట్టడి చేసింది. అందరి ఆలోచనలను తలకిందులు చేసింది. నిఫా వైరస్ వ్యాప్తి సమయంలో తీసుకున్న చర్యలు, వివిధ అనుభవాల నేపథ్యంలో విపత్తును ముందుగానే ఊహించి, యంత్రాంగాన్ని అప్రమత్తం చేసి తగిన చర్యలు చేపట్టింది. కేరళ రాష్ట్రంలో కరోనా రోగుల్లో 20 నుంచి 40 ఏళ్ల వయసు వారే అధికమని ఆ రాష్ట్ర ఆరోగ్యశాఖ మంత్రి కేకే శైలజ వెల్లడించారు. కరోనాతో మరణిస్తున్న వారిలో 72 శాతం మంది 60 ఏళ్ల వయసు పైబడిన వారేనని మంత్రి తెలిపారు. కేరళలో కరోనా సోకినా వారిలో 0.39 శాతం అంటే 656 మంది మరణించారని మంత్రి చెప్పారు. సెప్టెంబరు 26వతేదీ వరు 1,67,939 మందికి కరోనా సోకగా వారిలో 1,14, 530 మంది కోలుకున్నారని మంత్రి వివరించారు.ఒనం వేడుకల తర్వాత ఆంక్షలు ఎత్తివేయడంతో కరోనా పాజిటివ్ కేసుల సంఖ్య పెరిగిందని చెప్పారు.ఆ రాష్ట్ర ఆరోగ్య మంత్రి కేకే శైలజను ఐక్యరాజ్య సమితి కూడా ప్రశంసించింది. అయితే.. లాక్‌డౌన్ ఆంక్షలు ఎత్తేసిన తర్వాత పరిస్థితి ఒక్క సారిగా మారింది. గడిచిన వారం రోజులుగా అయితే.. కరోనా పాజిటివ్ కేసుల సంఖ్య భారీగా పెరుగుతోంది. కారణమేంటి? మళ్లీ లాక్‌డౌన్ తప్పదా? దేశవ్యాప్తంగా పెరుగుతున్న కేసుల రేటు 1.53 శాతం కాగా.. కేరళలో ఇది 3.51 శాతంగా ఉంది. అంటే రెట్టింపు కంటే ఎక్కువ. మహారాష్ట్ర, ఆంధ్రప్రదేశ్‌ రాష్ట్రాలతో పోల్చితే.. కేరళలో రోజూవారీగా నమోదవుతున్న కేసులు స్వల్పమే. అయితే.. కొత్తగా కేసులు నమోదవుతున్న రేటు మాత్రం చాలా ఎక్కువగా ఉంది. అదే ఆందోళన కలిగిస్తోంది. ప్రస్తుతం రాష్ట్రంలో దాదాపు 1.12 లక్షల కేసులు ఉన్నాయి.కొత్తగా అత్యధిక కేసులు నమోదవుతున్న రాష్ట్రాల్లో కేరళ ప్రస్తుతం నాలుగో స్థానంలో ఉంది. ఇదే పెరుగుదల రేటు కొనసాగితే.. టాప్ 10 రాష్ట్రాల జాబితాలోనూ చేరే ప్రమాదం ఉంది. మరోవైపు యాక్టివ్ కేసుల సంఖ్య కూడా అధికంగానే ఉంది. ఈ నేపథ్యంలో రాష్ట్రంలో మళ్లీ లాక్‌డౌన్ విధిస్తారనే ఊహాగానాలు ఊపందుకున్నాయి. ఆరోగ్య శాఖ మంత్రి కేకే శైలజ వ్యాఖ్యలు దీనికి మరింత ఊతమిస్తున్నాయి.ఇటీవ‌ల ఓన‌మ్ పండుగ త‌ర్వాత రాష్ట్రంలో మ‌ళ్లీ కరోనా పాజిటివ్ కేసుల సంఖ్య పెరిగింది. కేసులు ఒక‌వేళ ఇదేవిధంగా పెరుగుతూ పోతే.. అప్పుడు మళ్లీ లాక్‌డౌన్ విధించ‌క త‌ప్పదు’ అని కేరళ ఆరోగ్య మంత్రి శైలజ పేర్కొన్నారు. కరోనా నిబంధ‌న‌లను పాటించ‌కుంటే.. ప్రజలు భారీ మూల్యం చెల్లించాల్సి ఉంటుంద‌ని ఆమె హెచ్చరించారు.ఓన‌మ్ పండుగ స‌మ‌యంలో జ‌నం కాస్త హ‌ద్దులు మీరినట్లు నివేదికలు చెబుతున్నాయి. కరోనా నిబంధనలు పాటించకుండా ఇష్టారీతిన తిరిగినట్లు తెలుస్తోంది. దీనికి తోడు ఆ రాష్ట్రంలో కొద్ది రోజులుగా నిర‌స‌న ప్రదర్శనలు ఎక్కువ‌య్యాయి. వైర‌స్‌ వ్యాప్తి పెరగడానికి ఇవే కారణమని అధికారులు భావిస్తున్నారు.రాష్ట్రంలో 20 నుంచి 40 ఏళ్ల మ‌ధ్య వ‌య‌సువారే అధికంగా కరోనా బారిన పడుతున్నట్లు మంత్రి శైలజ తెలిపారు. 72 శాతం వృద్ధులు, 28 శాతం యువ‌త కొవిడ్‌తో మృతి చెందిన‌ట్లు ఆమె వెల్లడించారు. మరోవైపు.. కొత్తగా కేసులు పెరుగుతుండటంపై ముఖ్యమంత్రి పినరయి విజయన్‌ ఆందోళన వ్యక్తం చేశారు. ప్రజలంతా విషమ పరిస్థితుల్లోకి జారుకుంటున్నారని ఆయన హెచ్చరించారు. ఇకకైనా కోలుకోకపోతే ఇప్పటివరకు చేపట్టిన చర్యలు వృథా అవుతాయని.. రాష్ట్రంలో కరోనా విలయతాండవం చేస్తుందని వైద్య నిపుణులు హెచ్చరిస్తున్నారు.