ల‌క్నో, సెప్టెంబ‌ర్ 30, 
యూపీలో రెండు వారాల కింద యూపీలో ఓ యువతిని నాలుక కోసి అత్యాచారం చేసిన ఘటన దేశ వ్యాప్తంగా సంచలనం అయింది. మహిళలపై యూపీలో జరుగుతున్న అత్యాచారాలకు ఇదొక నిదర్శనం. పంట పొలాల చాటున ఓ యువతి నాలుక కోసి అత్యాచారానికి పాల్పడ్డారు. తీవ్ర గాయాలపాలైన ఆమె చికిత్స పొందుతూ మృతి చెందింది. ఉత్తరప్రదేశ్‌లోని హత్రస్‌లో చోటు చేసుకున్న ఈ ఘటనపై పెద్ద ఎత్తున నిరసన వ్యక్తం చేస్తున్నారు. హత్రస్‌కు చెందిన ఓ 20 ఏళ్ల యువతి ఈ నెల 14న తన అమ్మ, సోదరుడితో కలిసి గడ్డి కోసం పంట పొలాల్లోకి వెళ్లారు. గడ్డి కోసుకుని ముందే సోదరుడు ఇంటికి వచ్చాడు. తల్లి, కూతురు పొలంలోనే ఉండిపోయారు. తల్లికి కొద్ది దూరంలో ఉన్న ఆ యువతిని నలుగురు దుండగులు సమీపంలో ఉన్న సజ్జ చేనులోకి లాక్కెల్లి.. అరవకుండా నాలుక కోసేశారు. పొలంలోనే ఉన్న తల్లి కూతురు కోసం వెతకగా పొలాల్లో కనిపించింది. అప్పటికే బాధితురాలు అపస్మారక స్థితిలోకి వెళ్లిపోయింది.  అక్కడ్నుంచి అలీఘర్‌లోని ఓ ఆస్పత్రికి తరలించారు. బాధితురాలి పరిస్థితి విషమంగా ఉండడంతో ఢిల్లీలోని సఫ్దార్‌గంజ్‌ ఆస్పత్రికి తరలించి ఐసీయూలో చికిత్స అందించారు. ఆమె చికిత్స పొందుతూ మరణించింది. ఈ ఘటనపై కేసు నమోదు చేసుకున్న పోలీసులు ఇటీవలే నలుగురు నిందితులను అరెస్టు చేసి రిమాండ్‌కు తరలించారు. ఈ కేసులో పోలీసులు నిర్లక్ష్యం వహించారని, 14వ తేదీన ఫిర్యాదు చేస్తే నాలుగైదు రోజుల తర్వాత కేసు నమోదు చేశారని మృతురాలి కుటుంబ సభ్యులు ఆరోపించారు. బాధితురాలు ఎస్సీ కులానికి చెందిన యువతి కాగా, నలుగురు దుండగులు అగ్రకులాలకు చెందిన వారు.