శ్రీశైలం డ్యాంకు ప్రమాదం
కర్నూలూ, అక్టోబరు 30
శ్రీశైలం డ్యాంకు ప్రమాదం పొంచి ఉందా.. వెంటనే మరమ్మతులు చేయాలా అంటే అవుననే సమాధానం వినిపిస్తోంది. డ్యాం గేట్ల నుంచి విడుదల చేసే నీరు కిందకు పడే ప్రాంతంలో , దిగువన కుడి, ఎడమ గట్ల వైపు భారీగా మరమ్మతులు చేపట్టాల్సిన అవసరం ఉందని నిపుణుల కమిటీ సూచించింది. డ్యాం గేట్ల నుంచి నీటిని విడుదల చేసినపుడు కిందపడి మళ్లీ ఎగిరి పడే చోట భారీ గుంతలు ఏర్పడ్డాయని.. అవి క్రమంగా విస్తరించే ప్రమాదం ఉందంటున్నారు. డ్యాం పనులు చేయడానికి రూ.900 కోట్లు అవసరమని అంచనా వేశారట.2009లో శ్రీశైలానికి అనూహ్యంగా భారీ వరద వచ్చినపుడు దిగువన రెండు వైపులా దెబ్బతింది. అప్పటి నుంచి అవసరమైన రక్షణ చర్యలు చేపట్టాలని సూచిస్తూ వచ్చాయి. ఆంధ్రప్రదేశ్‌ ప్రభుత్వం నిపుణలతో ఏర్పాటు చేసిన కమిటీ ఈ ఏడాది మార్చిలో పలు అంశాలను గుర్తించింది. 6, 8 గేట్ల ఎదురుగా పెద్ద గుంతలు పడ్డాయి.. 100 మీటర్లకు పైగా లోతు ఉన్నట్లు గుర్తించారు. డ్యాం భద్రతకు ఎలాంటి నష్టం లేకుండా ప్లంజ్‌పూల్‌లో గుంతలు పూడ్చటంతో సహా పూర్తి స్థాయిలో అన్ని పనులు చేయాలని సూచించారట.ఒకవైపు శ్రీశైలం డ్యాం భద్రతా చర్యలు పూర్తి చేస్తూనే భారీ వరద వచ్చినపుడు మళ్లించడానికి అవసరమైన ప్రత్యామ్నాయాలపై దృష్టి పెట్టాలని కమిటీ సూచించింది. డ్యాంకు పైభాగంలో ఐదు కిలోమీటర్ల వద్ద మరో స్పిల్‌వే నిర్మించడం.. పక్క బేసిన్‌కు వరద మళ్లించేలా కాలువ తవ్వడం లాంటివి ప్రత్యామ్నాయాల్లో ఉన్నాయట. అంతేకాదు మరమ్మతులకు అయ్యే ఖర్చుకు కేంద్రం కూడా సాయం చేయాలని ఏపీ ప్రభుత్వం అంటోంది.