కడప ఎయిర్ పోర్టు  సమీపంలో ఘోర రోడ్డు ప్రమాదం జరిగింది. కడప-తాడిపత్రి మధ్య గోటూరు, తోళ్లగంగన్నపల్లె మధ్యలో టిప్పర్ సుమో, కారు ఢీకొనగా.. ఇందులో నలుగురు సజీవ దహనం అయ్యారు. ముగ్గురికి తీవ్ర గాయాలయ్యాయి. ఎర్రచందనం దుంగల్ని తరలిస్తున్న సుమోను టిప్పర్ ఢీకొట్టగా.. వెంటనే మరో కారు టిప్పర్ని ఢీకొట్టింది. సజీవ దహనమైన నలుగురు తమిళనాడుకు చెందిన ఎర్రచందనం స్మగర్లుగా గుర్తించారు. వెంటనే రంగంలోకి దిగిన ఫైర్ సిబ్బంది మంటల్ని అదుపులోకి తీసుకొచ్చారు. ప్రమాదానికి కారణమైన మరో కారు కూడా స్మగ్లర్లదే అని గుర్తించారు. దీనిపై కేసు నమోదు చేసుకున్న పోలీసులు దర్యాప్తును ప్రారంభించారు. తమిళనాడుకు చెందిన స్మగ్లర్లు పోలీసుల కళ్లుగప్పి అక్రమ మార్గంలో ఎర్రచందనం తరలిస్తుండగా ప్రమాదం జరిగింది. కడప శివారు గోటూరు వద్ద స్మగ్లర్లకు చెందిన రెండు కార్లు టిప్పర్ను ఢీకొన్నాయి. తెల్లవారుజామున 3 నుంచి 4 గంటల మధ్య టిప్పర్ రోడ్డు మలుపు తిరుగుతుండగా ఈ ప్రమాదం జరిగింది. మొదటి కారు ఢీకొన్న క్షణాల్లోనే వెనుక వస్తున్న స్కార్పియో టిప్పర్ డీజిల్ ట్యాంక్ని ఢీకొట్టింది.డీజిల్ ట్యాంకర్ను ఢీకొట్టడంతో మంటలు చెలరేగి ఎర్రచందనం ఉన్న రెండో కారులో నలుగురు సజీవ దహనమయ్యారు. మొదటి కారులో ఉన్న నలుగురిలో ముగ్గురు గాయపడగా వారిని రిమ్స్ కు తరలించారు. స్మగ్లర్లు కడప వైపు నుంచి తాడిపత్రి వైపు వెళ్తుండగా ప్రమాదం జరిగినట్లు పోలీసులు తెలిపారు. ఘటనాస్థలికి చేరుకుని అగ్నిమాపక సిబ్బంది మంటలార్పారు. మృతదేహాలు గుర్తు పట్టలేని విధంగా మారడంతో వారి వివరాలను తెలుసుకునేందుకు పోలీసులు ప్రయత్నిస్తున్నారు. వారంతా తమిళనాడు వాసులుగా పోలీసులు భావిస్తున్నారు.