ఏపీ ముఖ్యమంత్రి వైఎస్ జగన్‌కు సుప్రీంకోర్టు లాయర్ అశ్వినికుమార్ ఉపాధ్యాయ షాకిచ్చారు. మరోసారి అటార్నీ జనరల్‌ కేకే వేణుగోపాల్‌కు లేఖ రాశారు. జగన్‌, ఆయన ముఖ్య సలహాదారు అజేయకల్లంపై కోర్టు ధిక్కరణ ప్రక్రియ మొదలుపెట్టడానికి తనకు అనుమతివ్వాలని విజ్ఞప్తి చేశారు. ప్రస్తుతం సుప్రీంకోర్టు ప్రధాన న్యాయమూర్తి (సీజేఐ) పరిధిలో ఉన్నది జగన్‌ రాసిన లేఖే తప్ప.. అది కోర్టు ధిక్కరణ పరిధిలోకి వస్తుందంటూ తాను చేసిన ఫిర్యాదు కాదని, అందువల్ల కోర్టు ధిక్కరణ ప్రక్రియకు అనుమతివ్వాలని కోరారు.జగన్‌ వ్యక్తిగతంగా రాసిన లేఖ గోప్యంగా సీజేఐ దృష్టికి వెళ్లినా.. ప్రభుత్వ ముఖ్యసలహాదారు అజేయకల్లం ప్రెస్ మీట్ పెట్టి లేఖను విడుదల చేయడం వల్ల వ్యవహారం బహిర్గతమైందని లేఖలో అశ్వినీ కుమార్ ప్రస్తావించారు. ఇది ధిక్కార ధోరణితో ఉందని తనకు రాసిన లేఖలో ఏజీ అభిప్రాయపడినందున.. వారిపై కోర్టు ధిక్కరణ ప్రక్రియ మొదలుపెట్టడానికి అనుమతివ్వాలని కోరారు. లేఖ ప్రైవేట్ విషయం అయినప్పటికీ.. ఇక్కడ మరో వ్యక్తి ప్రకటన చేశారు. హైకోర్టు, సుప్రీంకోర్టు న్యాయమూర్తులు కేసులను ప్రభావితం చేస్తున్నారన్న భావనను ప్రజలకు కల్పించారని లేఖలో వివరించారు.ఈ వ్యవటమారం ప్రాథమికంగా కోర్టు ధిక్కార ధోరణి కిందికే వస్తుందని ఏజీ ప్రస్తావించిన అంశాలను అశ్వినీ కుమార్ గుర్తు చేశారు. ఈ పరిణామాలు సీజేఐ ముందున్న ఫిర్యాదులో భాగం కావని.. ప్రస్తుతం సీజేఐ పరిధిలో ఉన్నది న్యాయవ్యవస్థపై జగన్‌ చేసిన ఫిర్యాదు మాత్రమే అన్నారు. అది జగన్‌, అజేయ కల్లంలపై కోర్టు ధిక్కరణ ప్రక్రియ మొదలుపెట్టడానికి తనకున్న హక్కును ఉపయోగించుకోవడానికి ఎలా అడ్డంకి అవుతుందో తెలియడం లేదన్నారు. సుప్రీంకోర్టు 2011లో ప్రచురించిన రీస్టేట్‌మెంట్‌ ఆన్‌ కంటెంప్ట్‌ ఆఫ్‌ కోర్ట్‌ గురించి ఏజీ దృష్టికి తీసుకెళ్లారు.ఒకవేళ ఎవరైనా కోర్టు ధిక్కరణకు పాల్పడినట్లు తెలిస్తే.. వారిపై నేరపూరిత విచారణ మొదలుపెట్టాలని సెక్షన్‌ 15 కింద చేసుకున్న దరఖాస్తుపై అత్యున్నత న్యాయాధికారి అభిప్రాయం చెప్పడం వారి చట్టబద్ధమైన విధి అన్నారు సీనియర్ లాయర్. ఈ కేసులో జగన్, అజయకల్లంలది కోర్టు ధిక్కరణ ధోరణేనని ప్రాథమికంగా ఏజీ అభిప్రాయపడ్డారని.. అందుకే తదుపరి చర్యలక అనుమతివ్వాలన్నారు. ప్రస్తుతానికి వీరిపై కోర్టు ధిక్కరణ అంశం ఎక్కడా పెండింగ్‌లో లేనందున తన విజ్ఞప్తిని పునఃపరిశీలించి అనుమతివ్వాలని కోరారు.గతంలో కోర్టు ధిక్కరణ ప్రక్రియ మొదలు పెట్టడానికి అనుమతి ఇవ్వాలని అటర్నీ జనరల్ కే కే వేణుగోపాల్‌కు అశ్వినీ కుమార్ లేఖ రాయగా.. ఆ విషయం సీజేఐ పరిధిలో ఉన్నందున కోర్టు ధిక్కరణ ప్రక్రియ మొదలుపెట్టడానికి అనుమతివ్వలేనంటూ నవంబరు 2న ఏజీ బదులిచ్చారు. మళ్లీ తన విజ్ఞప్తిని పునఃపరిశీలించి అనుమతివ్వాలని మరో లేఖ రాయడం ఆసక్తికరంగా మారింది. మరి ఏజీ ఎలా స్పందిస్తారన్నది చూడాలి.