గుంటూరు జిల్లా తాడికొండ వైఎస్సార్‌సీపీలో రాజకీయం వేడెక్కింది. ఇటీవల పార్టీ నుంచి ఇద్దరు కార్యకర్తల్ని బహిష్కరించిన తర్వాత రగడ మొదలైంది. శృంగారపాటి సందీప్‌, సలివేంద్రం సురేష్‌లు ఎమ్మెల్యే శ్రీదేవి, ఎంపీ నందిగం సురేష్‌పై సంచలన వ్యాఖ్యలు చేశారు. ఆ తర్వాత తాడికొండ ఎమ్మెల్యే సందీప్, సురేష్‌ల నుంచి ప్రాణహాని ఉందని గుంటూరు పోలీసులకు ఫిర్యాదు చేసింది.
ఇటు తాడికొండ ఎమ్మెల్యే ఉండవల్లి శ్రీదేవి అక్రమ కేసులు పెట్టి తనను వేధిస్తున్నారని.. ముఖ్యమంత్రి జగనే తనను కాపాడాలని సందీప్‌ ఓ సెల్ఫీ వీడియో విడుదల చేశారు. తాజా పరిణామాలతో అజ్ఞాతంలోకి వెళ్లిన సందీప్‌ సెల్ఫీ వీడియో విడుదల చేశారు. ఎమ్మెల్యే శ్రీదేవికి అనుచరుడిగా ఉన్నానని.. తాను కొంతమంది దగ్గర ఆమెకు డబ్బులు ఇప్పించాను అని ఆవేదన వ్యక్తం చేశారు. ఆ డబ్బులు అడుగుతుంటే తప్పుడు కేసులు పెట్టిస్తున్నారని.. తనకు ఇద్దరు చిన్న బిడ్డలు ఉన్నారని.. ఇంటి నుంచి పారిపోవాల్సిన పరిస్థితి వచ్చింది అన్నారు. ముఖ్యమంత్రి జగన్ తనను కాపాడాలని.. సాయం చేయాలని.. తన ముందు మరణం తప్ప ఏమీ లేదన్నారు.బిడ్డల మీద ప్రమాణం చేసి చెబుతున్నానని.. ఎమ్మెల్యే తనను మోసం చేసిందని సందీప్ కన్నీళ్లు పెట్టుకున్నారు. తనను రోడ్డు పడేశారని.. తన మీద అక్రమ కేసులు పెట్టిస్తున్నారని.. తుళ్లూరు, గుంటూరు పోలీస్ స్టేషన్‌లో కేసులు పెట్టించారని ఆవేదన వ్యక్తం చేశారు. ఇంటికి వెళ్లి వారం రోజులు అవుతోందని.. ఎమ్మెల్యే శ్రీదేవి, సీఐ ధర్మేంద్ర వల్ల ప్రాణ హాని ఉందన్నారు.