ముంబై, నవంబర్ 13 
నిజ జీవితంతో కొందరికి జరిగిన సంఘటనల గురించి తెలిస్తే.. ఈ ప్రపంచంలో ఎవరిని నమ్మాలో, ఎవరిని నమ్మకూడదో అర్థంకాదు. ముఖ్యంగా ఎన్ని చట్టాలు వచ్చినా మహిళలకు రక్షణ అనేది కరువైందని ఆయా విషయాలు స్పష్టం చేస్తుంటాయి. మహిళలపై జరుగుతున్న లైంగిక దాడులు ఎక్కడో చోట, ఎలాగోలా బయటపడుతుంటడం యావత్ దేశ ప్రజానీకానికి తలవంపు తెస్తున్నాయి. కాగా.. తాజాగా జరిగిన ఓ మీడియా సమావేశంలో ఓ ఆధ్యాత్మిక గురువు వికృత చేష్టల గురించి సినీ నటి అనుప్రియ గోయెంకా చెప్పిన విషయాలు తెలిసుకొని షాక్ అవుతున్నారు జనం. ఇటీవలే ప్రకాష్ ఝా దర్శకత్వంలో రూపొందిన 'ఆశ్రమ్ 2' వెబ్ సిరీస్‌ ద్వారా ప్రేక్షకుల ముందుకొచ్చిన అనుప్రియ గోయెంకా.. తాజాగా ఓ ఇంటర్వ్యూలో మాట్లాడుతూ ఓపెన్ అయింది. తన యుక్తవయసులో ఓ ఆధ్యాత్మిక గురువు లైంగిక వేధింపుల తాలూకు విషయాలు బయటపెట్టి సంచలనం సృష్టించింది. తన ఫ్యామిలీ ఎంతగానో నమ్మిన బాబానే తనపై లైంగిక దాడి చేయబోయాడని పేర్కొంటూ ఆ చేదు అనుభవాలను వివరించింది.''నాన్నతో పాటు మా ఫ్యామిలీ మొత్తానికి ఆధ్యాత్మిక చింతన ఎక్కువగా ఉండేది. నేను యుక్త వయసులో ఉండగా మా కుటుంబం ఓ బాబాను బాగా నమ్మేది. ఆయన మాటలనే వేదవాక్కుగా భావించేవాళ్ళం. ఆయన చేస్తున్న ప‌నులు ఆచ‌ర‌ణాత్మ‌కంగా, స‌హేతుకంగా అనిపించడంతో క్రమంగా నేను కూడా ఆయనను నమ్మడం మొదలు పెట్టాను. కానీ, నా నమ్మకాన్ని అలుసుగా తీసుకొని ఆ బాబా నన్ను లొంగదీసుకోవాలని ప్లాన్ చేశాడు. అది జరిగినప్పుడు నా వయస్సు 18 సంవత్సరాలు మాత్రమే. చాలా భయమేసింది. దీంతో ఆ విషయం చాలా రోజులు దాచిపెట్టి చివరకు ఇంట్లో చెప్పేశాను. అప్పటినుంచి ఆ దొంగబాబాకు దూరంగా ఉంటున్నాం. ఆ నీచమైన సంఘటన తలచుకున్నప్పుడల్లా నాకు చిరాకు వస్తుంది. ఆయనే కాదు నా జీవితంలో ఇలాంటి కీచకులు చాలామందే తారసపడ్డారు'' అని పేర్కొంది అనుప్రియ గోయెంకా.