కర్నూలు, నవంబర్ 16, 
కర్నూలు జిల్లా నంద్యాలలో అబ్దుల్ సలాం కుటుంబం ఆత్మహత్య ఘటన అందరినీ తీవ్రంగా కలచివేసిందని టీడీపీ జాతీయ అధికార ప్రతినిధి కొమ్మారెడ్డి పట్టాభిరామ్ అన్నారు. ఈ కేసుకు సంబంధించి పట్టాభి సంచలన వ్యాఖ్యలు చేశారు. సలాం ఫ్యామిలీ ఆత్మహత్య కేసులో నమోదు చేసిన ఎఫ్ఐఆర్, రిమాండ్ రిపోర్ట్, విట్‌నెస్ సర్టిఫికెట్లు పరిశీలిస్తే అనేక వైరుధ్యాలున్నాయని ఆయన అనుమానం వ్యక్తం చేశారు. ఈ నెల 3న రైల్వే పోలీసులు నమోదు చేసిన ఎఫ్ఐఆర్ నెం-22/2020ని పరిశీలిస్తే, అందులో చెప్పినట్లుగా 264/ 6-7 పోస్టుల మధ్య, పాణ్యం-నంద్యాల రైల్వే స్టేషన్ల మధ్య, రైలుపట్టాలపై ఘటన జరిగిందని చెప్పారన్నారు. మ‌‌‌ృతదేహాలను చూసిన గ్యాంగ్‌మెన్ సురేష్.. స్టేషన్ మాస్టర్ శివప్రసాద్‌కి చెబితే ఆయన రైల్వే పోలీసులకు మధ్యాహ్నం 2.15 గంటలకు సమాచారం అందించారన్నారు. వెంకటేశ్వర్లు అనే రైల్వే ఇన్‌స్పెక్టర్ ఘటనా స్థలానికి చేరుకొని, 2.40 నుంచి సాయంత్రం 4.40 గంటల వరకు స్పాట్‌లోనే విచారణ చేసినట్లుగా పేర్కొన్నారని పట్టాభి తెలిపారు.అనంతరం మృతదేహాలను పోస్టుమార్టం కోసం నంద్యాల ప్రభుత్వ ఆసుపత్రికి తరలించారని పట్టాభి వివరించారు. ఘటనా స్థలం నుంచి మృతదేహాలు నంద్యాల ఆసుపత్రికి రావడానికి అరగంట సమయం పడితే, సాయంత్రం 6 గంటల తర్వాత చీకటి పడే వేళ పోస్టుమార్టం నిర్వహించారని చెప్పుకొచ్చారు. సాయంత్రం 5 గంటల తర్వాత పోస్టుమార్టం నిర్వహించకూడదనే నిబంధనను సైతం లెక్కచేయకుండా ఆ పని ఎలా చేశారో ముఖ్యమంత్రి, పోలీస్ శాఖ సమాధానం చెప్పాలని కొమ్మారెడ్డి డిమాండ్ చేశారు. ఎవరి ఒత్తిడికి తలొగ్గి చీకటి పడ్డాక హడావుడిగా ఎందుకు పోస్టుమార్టం చేశారో చెప్పాలని, రాత్రి వేళ పోస్టుమార్టం నిర్వహించే అనుమతులు నంద్యాల ప్రభుత్వ ఆస్పత్రికి లేనప్పటికీ ఎందుకలా చేశారో చెప్పాలని నిలదీశారు.అలా చేయాలంటే జిల్లా కలెక్టర్, ఫోరెన్సిక్ డిపార్ట్‌మెంట్ అనుమతి కావాలని, ఎలాంటి అనుమతులు లేకుండా, సరైన లైటింగ్ కూడా లేకుండానే సలాం కుటుంబ సభ్యుల మృతదేహాలకు తూతూమంత్రంగా నిబంధనలకు విరుద్ధంగా పోస్టుమార్టం పూర్తిచేశారని పట్టాభి ఆరోపించారు. అలాగే అర్ధరాత్రి 11 నుంచి 12 గంటల సమయంలో వారి మృతదేహాలకు హడావుడిగా ఖననం చేశారని చెప్పారు. ముస్లిం సంప్రదాయాలకు విరుద్ధంగా ఒక్కో గోతిలో రెండేసి మృతదేహాలను పడేశారని కొమ్మారెడ్డి పట్టాభి ఆగ్రహం వ్యక్తం చేశారు.అబ్దుల్ సలాం అత్తగారైన మాబున్నీసా ఇచ్చిన స్టేట్‌మెంట్ చూస్తే, 3వ తేదీ ఉదయం 11.30 గంటలకు ఆమె నంద్యాల మూడో పట్టణ పోలీస్ స్టేషన్లో తన కుమార్తె, అల్లుడు, పిల్లలు కనిపించడం లేదని ఫిర్యాదు చేసినట్లుగా పట్టాభి పేర్కొన్నారు. అయితే మూడో పట్టణ పోలీస్ స్టేషన్ సీఐ తనకు ఆ రోజు మధ్యాహ్నం 12:45 నిమిషాలకే ఫోన్ చేశారని మాబున్నీసా స్టేట్‌మెంట్ ఇచ్చినట్లుగా చెప్పారన్నారు. రైల్వే ట్రాక్‌పై మృతదేహాలు ఉన్నాయని రైల్వే పోలీసులకు మధ్యాహ్నం 2.15 గంటలకు సమాచారం వస్తే, దానికంటే రెండు గంటల ముందే, ఆ విషయం నంద్యాల మూడో పట్టణ పోలీసులకు ఎలా తెలిసిందని పట్టాభి ప్రశ్నించారు.మూడో పట్టణ పోలీస్ స్టేషన్ సీఐ కాల్ లిస్ట్ తీస్తే ఆయనకు మార్గదర్శనం ఎవరు చేశారో తెలుస్తుందని పట్టాభి చెప్పారు. అలాగే కోర్టులో సీఐకి, కానిస్టేబుల్ గంగాధర్‌కి బెయిల్ రావడానికి ష్యూరిటీ ఇచ్చింది తాతిరెడ్డి తులసిరెడ్డి అని, అతను నంద్యాల వైసీపీ ఎమ్మెల్యే శిల్పా రవికిశోర్ రెడ్డికి ప్రధాన అనుచరుడని పట్టాభి ఆరోపించారు. తాతిరెడ్డి, తులసిరెడ్డి, అతని బావమరిది మద్దిలేటి స్వామిరెడ్డి ఇద్దరూ కోర్టులో దగ్గరుండి మరీ పోలీసులకు ష్యూరిటీలిచ్చారని, వైసీపీ రాష్ట్ర కార్యదర్శి జగన్ ప్రసాద్, శిల్పా రవికిశోర్ ఆదేశాల ప్రకారం, అదే రోజు తన అనుచరులతో కోర్టు హాల్లో ఉన్నాడని వ్యాఖ్యానించారు. జామీను డబ్బుకట్టి, సంతకాలు ఎవరు పెట్టారో, రికార్డులు బయటకు తీస్తే, వాస్తవాలు తెలుస్తాయన్నారు. ఈ కేసులో మరో ముఖ్యమైన వ్యక్తి అయిన గంగిశెట్టి శ్రీధర్ వైసీపీ కార్యదర్శి అని, అతను సలాం కుటుంబాన్ని వేధించడంలో కీలకపాత్ర పోషించాడని చెప్పారు. ఈ విధంగా అనేక నిజాలను కప్పిపెట్టి, సలాం కుటుంబం చనిపోయే వరకు వేధించుకుతిన్నది ముమ్మాటికీ వైసీపీ నేతలే అని పట్టాభి ఆరోపించారు. ఈ కేసులో ఇన్ని మలుపులున్నాయి కాబట్టే, సీబీఐకి అప్పగించాలని ముఖ్యమంత్రి వైఎస్ జగన్మోహన్ రెడ్డిని డిమాండ్ చేస్తున్నామని పట్టాభిరామ్ పేర్కొన్నారు.