హైద్రాబాద్, నవంబర్ 18, 
నటుడు సోనూ సూద్ తన సేవా కార్యక్రమాలను కొనసాగిస్తున్నారు. స్మార్ట్ ఫోన్ లేని కారణంగా ఆన్‌లైన్ క్లాసులు వినలేకపోతున్న బాలికల కష్టాలు తెలుసుకొని వెంటనే ఫోన్ కొనిచ్చారు. మొత్తం 13 మంది అమ్మాయిలకు స్మార్ట్ ఫోన్లు అందజేశారు. వారి ముఖాల్లో ఆనందం నింపారు. ఆన్‌లైన్ క్లాసులు వినలేకతున్నానంటూ ఓ చిన్నారి తన గోడు వెల్లబోసుకుంటున్న దృశ్యాలకు సంబంధించిన 9 సెకన్ల నిడివి గల వీడియో సోనూ సూద్ దృష్టికి రావడంతో.. ఆయన వెంటనే సాయం అందించారు.తన తల్లిదండ్రులు పేదవారని.. స్మార్ట్ ఫోన్ కొనిచ్చే స్థోమత లేదని, ఈ కారణంగా తన టీచర్లు చెబుతున్న ఆన్‌లైన్ పాఠాలు వినలేకపోతున్నానని ఆ బాలిక వీడియోలో ఆవేదన వ్యక్తం చేసింది. ఆ బాలిక కుటుంబం పంజాబ్‌లోని సరిహద్దు పట్టణం ఫజిల్కాలో స్లమ్ ఏరియాలో నివాసం ఉంటున్నట్లు తెలుసుకున్న సోనూ సూద్.. గిల్హోత్రా అనే స్వచ్ఛంద సంస్థ ప్రతినిధుల ద్వారా ఆమెను చేరుకోగలిగారు. ఆ బాలిక లాంటి మరో 12 మందికి స్మార్ట్ ఫోన్లు కొనిచ్చారు. వారి చదువులకు బాధ్యత వహిస్తానని భరోసా ఇచ్చారు.కరోనా లాక్‌డౌన్ నుంచి సోనూ సూద్ ఎంతో మందికి సాయం అందిస్తూ ఉన్నారు. దేశంలో ఇప్పుడు ఆయన పేరు మార్మోగిపోతోంది. సినిమాల్లో విలన్ పాత్రలు పోషించే ఈ నటుడు నిజ జీవితంలో రియల్ హీరోగా మారారు. కష్టాల్లో ఉన్న వారి గురించి తెలుసుకొని వారి ముందు ఇట్టే వాలి పోతున్నారు. వరాలు ఇచ్చే దేవుడిలా వారి కష్టాలు తీరుస్తున్నారు. కరోనా కష్టకాలంలో ఎంతో మంది పేదలు, వలస కూలీలకు సాయం అందించారు. అందరి బంధువుగా మారారు.మరోవైపు.. సోనూ సూద్‌కు అరుదైన గౌరవం దక్కింది. భారత ఎన్నికల సంఘం ఆయణ్ని పంజాబ్ రాష్ట్ర ఐకాన్‌గా నియమిస్తూ ఉత్తర్వులు జారీ చేసింది. సోనూ సూద్ పంజాబ్ రాష్ట్రంలోని మెగా జిల్లాకు చెందినవారు. తన సొంత రాష్ట్రానికి ఐకాన్‌గా నియామకం కావడం పట్ల ఆయన సంతోషం వ్యక్తం చేశారు.ఈ గౌరవానికి చాలా ధన్యవాదాలు. నా రాష్ట్రం నన్ను చూసి గర్వించడం పట్ల చాలా సంతోషంగా ఉంది. నా ఆనందాన్ని మాటల్లో చెప్పలేకపోతున్నా’ అని సోనూ సూద్ అన్నారు.