ముంబై, డిసెంబర్ 1, 
భారీ అప్పులతో ఆంధ్రప్రదేశ్ ఆర్థిక పరిస్థితిని దిగజార్చారని ప్రతిపక్ష పార్టీలు తీవ్రస్థాయిలో ఆరోపణలు, విమర్శలు చేస్తున్న సమయంలో ముఖ్యమంత్రి వైఎస్ జగన్మోహన్ రెడ్డి సైలెంట్‌గానే మాస్టర్ స్ట్రోక్ ఇచ్చారు. ప్రతిష్టాత్మక ‘స్టేట్ ఆఫ్ ది స్టేట్స్’ అధ్యయనంలో ఆర్థికాభివృద్ధి విభాగంలో ఆంధ్రప్రదేశ్ ఏకంగా టాప్ ర్యాంకును సొంతం చేసుకుంది. దేశంలోని పెద్ద రాష్ట్రాల్లో ఓవరాల్ మోస్ట్ ఇంప్రూవ్డ్ రాష్ట్రాల్లో ఏపీ రెండో స్థానంలో నిలిచింది. గత టీడీపీ హయాంలో 8వ స్థానంలో నిలవగా, ప్రస్తుతం రెండో స్థానానికి చేరింది.
స్టేట్‌ ఆఫ్‌ స్టేట్స్‌ స్టడీ- 2020
వివిధ రంగాల్లో అభివృద్ధి అధ్యయనాలకు సంబంధించి బాగా ప్రాచుర్యం పొందిన ‘‘మార్కెటింగ్‌ అండ్‌ డెవలప్‌మెంట్‌ రీసెర్చ్‌ అసోసియేట్స్‌ (ఎండీఆర్‌ఏ)’’తో కలిసి ‘ఇండియా టుడే’ సంస్థ ఏటా ‘స్టేట్ ఆఫ్ ది స్టేట్స్’ పేరిట రెండేళ్లకు ఒకసారి ర్యాంకులు విడుదల చేస్తోంది. భారత్ సహా ప్రపంచమంతటా ఏడాది కాలంగా కరోనా విలయం కొనసాగుతోన్న నేపథ్యం, చైనా తప్ప అన్ని దేశాల ఆర్థిక వ్యవస్థలు కుప్పకూలిపోవడం, 50కిపైగా దేశాలు దీవాళా తీయడం, దేశంలోని అన్ని రాష్ట్రాలూ గడ్డు పరిస్థితులను ఎదుర్కొంటున్న క్రమంలో స్టేట్ ఆఫ్ ది స్టేట్స్-2020 అధ్యయనానికి ప్రాధాన్యం ఏర్పడింది. ఈ తరుణంలో కరోనా ప్రతికూలతల నుంచి దాటుకుని వృద్ధిని సాధిస్తోన్న రాష్ట్రాల్లో ఆంధ్రప్రదేశ్ టాప్ ర్యాంకు సాధించింది.
మొత్తం 12 రంగాల్లో సర్వే
కరోనా ప్రతికూల పరిస్థితులను అధిగమించి ఆర్థిక, పర్యాటకం, మౌలిక సదుపాయాలు, సమ్మిళిత అభివృద్ధి, పరిపాలన, శాంతిభద్రతలు, ఎంటర్‌ప్రెన్యూర్‌షిప్, పరిశుభ్రత, పర్యావరణం, విద్య, ఆరోగ్యం, వ్యవసాయం వంటి 12 రంగాల్లో ఆయా రాష్ట్రాలు సాధిస్తున్న ప్రగతిపై అధ్యనం చేసి, ‘ఇండియా టుడే-ఎండీఆర్‌ఏ’ తన ‘స్టేట్ ఆఫ్ ది స్టేట్స్’ ర్యాంకులను రూపొందించింది. ఇందులో అత్యుత్తమ మెరుగైన (మోస్ట్‌ ఇంప్రూవ్డ్‌) పెద్ద రాష్ట్రాల విభాగంలో ఆర్థిక రంగం, పర్యాటక రంగాల్లో ఆంధ్రప్రదేశ్‌ ప్రథమ స్థానంలో నిలిచింది. పెద్ద రాష్ట్రాల్లో ఓవరాల్ మోస్ట్ ఇంప్రూవ్డ్ రాష్ట్రాల్లో ఏపీ రెండో స్థానంలో నిలిచింది. గత టీడీపీ హయాంలో 8వ స్థానంలో నిలవగా, ప్రస్తుతం రెండో స్థానానికి చేరింది.మొత్తం 12 రంగాలకు సంబంధించి ఆయా రాష్ట్రాలు సాధించిన ప్రగతి ఆధారంగా ‘స్టేట్ ఆఫ్ ది స్టేట్స్’ ర్యాంకులు ప్రకటించారు. ఆయా విభాగాల్లో రాష్ట్రాలను ఉత్తమ ప్రదర్శన (బెస్ట్‌ పెర్ఫార్మింగ్‌), అత్యుత్తమ మెరుగైన (మోస్ట్‌ ఇంప్రూవ్డ్‌), ఓవరాల్‌ కేటగిరీలుగా విభజించింది. వాటికి అనుగుణంగా స్కోర్‌ ఇచ్చింది. ఆయా విభాగాల్లో ఉత్తమ రాష్ట్రాలను విజేతలుగా పేర్కొంది. ఈ అధ్యయనంలో భాగంగా 35 వేల చదరపు కి.మీ.ల భౌగోళిక విస్తీర్ణం లేదా 5 మిలియన్‌ల కంటే ఎక్కువ జనాభా కలిగిన 20 రాష్ట్రాలను పెద్ద రాష్ట్రాలుగానూ, అంతకంటే తక్కువ విస్తీర్ణం, జనాభా కలిగిన రాష్ట్రాలను చిన్న రాష్ట్రాలుగానూ వర్గీకరించింది. వీటికి అనుగుణంగా ర్యాంకులు ఇచ్చింది.
నిలబెట్టుకున్న ఏపీ.. పడిపోయిన తెలంగాణ
ఆర్థికాభివృద్ధి, పర్యాటక రంగాల్లో ఏపీ టాప్ ర్యాంకును పొందగా, మోస్ట్‌ ఇంప్రూవ్డ్‌ కేటగిరిలో రెండో స్థానంలో నిలిచింది. గత టీడీపీ హయాం (2018)లో పలు విభాగాల్లో ఎనిమిదో స్థానంలో ఉన్న ఏపీ.. జగన్ సీఎం అయిన ఏడాదికే రెండో స్థానానికి చేరడం గమనార్హం. 2020 ర్యాంకుల్లోనే ఏపీ తన స్థానాన్ని నిలబెట్టుకోవడంతోపాటు ఆర్థికాభివృద్ధిలో టాప్‌కు చేరింది. ఓవరాల్ (మోస్ట్ ఇంప్రూవ్డ్) పెద్ద రాష్ట్రాల ర్యాంకుల్లో తెలంగాణ ఒక ర్యాంకు కిందికి దిగజారింది. 2019లో 9వ స్థానంలో ఉన్న తెలంగాణ ఇప్పుడు 10వ స్థానంలో నిలిచింది. అయితే, ఓవరాల్‌ బెస్ట్‌ పెర్ఫార్మెన్స్‌ పెద్ద రాష్ట్రాల విభాగంలో ఏపీ 7వ ర్యాంకులో (గతేడాది 8వ ర్యాంకు) నిలవగా, తెలంగాణ 9 స్థానంలో ‘ఇండియా టుడే-ఎండీఆర్‌ఏ’ విడుదల చేసిన ‘స్టేట్ ఆఫ్ ది స్టేట్స్-2020’ రిపోర్టులో వివిధ రంగాల్లో విజేతలుగా నిలిచిన పెద్ద రాష్ట్రాల లిస్టు ఇలా ఉంది.
1) ఆర్థిక రంగంలో మోస్ట్ ఇప్రూవ్డ్‌గా ఆంధ్రప్రదేశ్, బెస్ట్ పెర్ఫామర్‌గా గుజరాత్ నిలిచాయి.
2) మౌలిక సదుపాయాల కల్పనలో బెస్ట్ పెర్ఫామర్ పంజాబ్, మోస్ట్ ఇప్రూవ్డ్ జార్ఖండ్.
3) వ్యవసాయంలో బెస్ట్ పంజాబ్, మోస్ట్ ఇంప్రూవ్డ్ మధ్యప్రదేశ్.
4) పర్యాటకంలో బెస్ట్ మహారాష్ట్ర, మోస్ట్ ఇంప్రూవ్డ్ ఆంధ్రప్రదేశ్.
5) శాంతి భద్రతల్లో పంజాబ్ బెస్ట్ పెర్ఫార్మర్, పశ్చిమబెంగాల్ మోస్ట్ ఇప్రూవ్డ్
6) విద్యారంగంలో హిమాచల్ బెస్ట్, వెస్ట్ బెంగాల్ మోస్ట్ ఇంప్రూవ్డ్.
7) ఆరోగ్యంలో కేరళ బెస్ట్, ఒడిశా మోస్ట్ ఇంప్రూవ్డ్.
8) పరిశుభ్రతలో హిమాచల్ బెస్ట్, ఒడిశా మోస్ట్ ఇంప్రూవ్డ్.
9) పరిపాలనలో రాజస్థాన్ బెస్ట్ పెర్ఫార్మర్, అస్సాం మోస్ట్ ఇవప్రూవ్డ్
మోస్ట్ ఇప్రూవ్డ్ పెద్ద రాష్ట్రాలుగా అస్సాం, ఆంధ్రప్రదేశ్, మధ్యప్రదేశ్, పశ్చిమ బెంగాల్, హర్యానా రాష్ట్రాలు టాప్-5లో నిలిచాయి. బెస్ట్ పెర్ఫార్మింగ్ విభాగాల్లో తమిళనాడు, హిమాచాల్ ప్రదేశ్, పంజాబ్, కేరళ, గుజరాత్ టాప్-5లో ఉన్నాయి. కొవిడ్ నియంత్రణకు సంబంధించి పెద్ద రాష్ట్రాల్లో అస్సాం 1వ ర్యాంకులో, తమిళనాడు 2, ఆంధ్రప్రదేశ్ 3వ ర్యాంకులో నిలిచాయి. తెలంగాణ 12వ స్థానంలో ఉంది.