న్యూఢిల్లీ,
జమ్మూ కశ్మీర్ సరిహద్దుల్లో దాయాది ఆగడాలు రోజు రోజుకూ శ్రుతిమించుతున్నాయి. గత కొద్ది రోజులుగా నియంత్రణ రేఖ వెంబడి గ్రామాలు, పౌరులే లక్ష్యంగా కాల్పులకు తెగబడుతోంది.జమ్మూ కశ్మీర్ సరిహద్దుల్లో పాక్ సైన్యం మరోసారి కాల్పులు ఉల్లంఘనకు పాల్పడింది. రాజౌరి జిల్లా సుందర్‌బనీ సెక్టార్‌లో శుక్రవారం ఉదయం పాకిస్థాన్ సైన్యం జరిపిన కాల్పుల్లో ఇద్దరు జవాన్లు అమరులయ్యారు. పాక్ కాల్పుల్లో తీవ్రంగా గాయపడిన నాయిక్ ప్రేమ్ బహదూర్ ఖాత్రీ, రైఫిల్‌మ్యాన్ సుఖ్‌బీర్ సింగ్‌లు ఆస్పత్రిలో చికిత్స పొందుతూ తుదిశ్వాస విడిచినట్టు రక్షణ శాఖ పీఆర్ఓ తెలిపింది. పాక్ దుశ్చర్యలను సైన్యం దీటుగా తిప్పికొడుతోంది. ట్యాంకులు, శతఘ్నులతో దాయాదిపై ప్రతీకార దాడి చేసింది. పూంచ్ జిల్లాల్లో నియంత్రణ రేఖ వెంబడి సైనిక స్థావరాలు, గ్రామాలపై పాక్ సైన్యం జరిపిన కాల్పుల్లో ఓ జూనియర్ కమిషన్డ్ ఆఫీసర్ ప్రాణాలు కోల్పోగా.. ఓ పౌరుడు తీవ్రంగా గాయపడిన విషయం తెలిసిందే. కిందటి శనివారం అంతర్జాతీయ సరిహద్దుల్లో నియంత్రణ రేఖ వెంబడి పాక్ విచక్షణారహితంగా కాల్పులు తెగబడిన ఘటనలో ఓ సైనికుడు, ఇద్దరు మహిళలు సహా నలుగురు ప్రాణాలు కోల్పోయారు. నవంబరు 13న పాక్ కాల్పుల్లో ఐదుగురు సైనికులు సహా 11 మంది బలయ్యారు. అక్టోబరు 1న పూంఛ్ జిల్లా కృష్ణాఘాటీ వద్ద పాక్ రేంజర్లు జరిపిన కాల్పుల్లో ఆర్మీ జవాన్ అమరుడయ్యాడు.గత 17ఏళ్లలో ఎన్నడూలేని విధంగా ఈ ఏడాది పాక్ సైన్యం కాల్పులు విరమణ ఒప్పందాన్ని ఉల్లంఘించింది. అక్టోబరు 6 వరకు 3,589 సార్లు కాల్పులు ఉల్లంఘనకు పాల్పడింది. గతేడాది మొత్తం 3,168సార్లు ఒప్పందాన్ని ఉల్లంఘించిన దాయాది.. ఈ ఏడాది ఆ రికార్డును రెండు నెలల ముందే అధిగమించడం గమనార్హం. సెప్టెంబరులో అత్యధికంగా 427సార్లు ఉల్లంఘించగా.. తర్వాత మార్చి (411), ఆగస్టు (408), మే (382), ఫిబ్రవరి (366), జనవరి (357) ఉన్నాయి.