విశాఖకు ఏలూరు తరహా ముప్పు పొంచి ఉందన్నారు రిటైర్డ్ ఐఏఎస్ అధికారి ఈఏఎస్ శర్మ. నగరంలో నీటి కాలుష్య సమస్య తీవ్రంగా ఉందని ముఖ్యమంత్రి వైఎస్ జగన్‌కు లేఖ రాశారు. విశాఖ నగరంతో పాటు పట్టణాల్లో మంచినీటి కాలుష్య సమస్య తీవ్రంగా ఉందని.. మంచినీటి వనరులు, పైపులైను వ్యవస్థలు, పైపులైన్లకు వినియోగించే పైపుల నాణ్యత అంశాలన్నీ నీటి కాలుష్యానికి కారణమవుతున్నాయని లేఖలో ప్రస్తావించారు. ఏలూరులో జరిగిన ఘటనను దృష్టిలో ఉంచుకొని సీఎంతో పాటు పలువురు ప్రభుత్వ పెద్దలకు ఈ-మెయిల్‌లో లేఖలు పంపారు.దేశంలోని 26 నగరాల్లో మోతాదుకు మించిన సీసంతో కలుషితమైన నీరే సరఫరా అవుతోందని 'క్వాలిటీ కౌన్సిల్‌ ఆఫ్‌ ఇండియా'(QCI)చేసిన అధ్యయనంలో తేలిందని లేఖలో ప్రస్తావించారు. మున్సిపాలిటీలు/నగరపాలక సంస్థల్లో సీసం పూతతో తయారైన పైపుల వినియోగం కూడా నీరు విషతుల్యం కావడానికి కారణం అంటున్నారు. కాలుష్యానికి కారణమతున్న అంశాలపై లోతైన దర్యాప్తు చేయించాలని సీఎం జగన్‌ను కోరారు.