విశాఖ డాక్టర్ సుధాకర్ కేసుపై హైకోర్టులో విచారణ జరిగింది. డాక్టర్ సుధాకర్ కేసులో తుది నివేదికను నవంబర్ 25న సీబీఐ అధికారులు కోర్టుకు సమర్పించారని.. విచారణ పూర్తి చేసి ఒక నిర్ణయానికి వచ్చామని న్యాయస్థానం తెలిపింది. ఈ కేసు దర్యాప్తు నివేదికలో అన్ని విషయాలు పొందుపరుస్తూ తదుపరి విచారణను హైకోర్టు డిసెంబర్ 20కి వాయిదా వేసింది. కోర్టు ఈసారి ఎలాంటి నిర్ణయం తీసుకుంటుంది అన్నది ఆసక్తికరంగా మారింది. కోర్టుకు సీల్డ్ కవర్‌లో రిపోర్ట్‌ను సీబీఐ అందజేసింది.. కేసు వివరాలను తెలియజేయాలని కోర్టు కోరింది. ఈ కేసు సున్నితమైన అంశం కాబట్టి ఓపెన్ కోర్టులో బహిర్గతం చేయలేమని సీబీఐ తెలిపింది.డాక్టర్ సుధాకర్ విశాఖ జిల్లా నర్సీపట్నం ప్రభుత్వ ఆస్పత్రిలో పనిచేస్తున్నారు. కరోనా సమయంలో ఆస్పత్రిలో మాస్కులు, పీపీఈ కిట్లు లేవంటూ ఆరోపించారు. ఆ తర్వాత ప్రభుత్వం ఆయన్ను సస్పెండ్ చేసింది.. ఈ నిర్ణయంపై విపక్షాల నుంచి విమర్శలు వచ్చాయి. సుధాకర్‌పై సస్పెన్షన్ ఎత్తేయాలని డిమాండ్ చేశారు. ఆ తర్వాత కొద్దిరోజులు ఆయన కనిపించ లేదు. మళ్లీ మే 16న విశాఖలో ప్రత్యక్షమయ్యారు. రోడ్డుపై పోలీసుల విధులకు ఆటంకం కలిగించారని అరెస్ట్ చేశారు.ఆ తర్వాత సుధాకర్‌ మానసిక పరిస్థితి సరిగా లేదని కేజీహెచ్‌ వైద్యులు చెప్పడంతో.. పోలీసులు ప్రభుత్వ మెంటల్ ఆస్పత్రికి తరలించారు. అయితే డాక్టర్ సుధాకర్‌ విషయంలో విశాఖ పోలీసులు వ్యవహరించిన తీరుపై వీడియోలతో ఏపీ టీడీపీ రాష్ట్ర మహిళా అధ్యక్షురాలు వంగలపూడి అనిత హైకోర్టుకు లేఖ రాశారు. దీంతో కోర్టు ఈ లేఖను సుమోటో పిల్‌గా పరిగణించి విచారణ జరిపింది.. అలాగే మరో వ్యక్తి పిటిషన్ దాఖలు చేశారు. అనంతరం కోర్టు ఈ కేసును సీబీఐకి అప్పగించగా దర్యాప్తు జరుగుతోంది.